Bike salgipa mandeni ja·a samsa be·a
TURA: Robibar salni 10:30 bajimango, Tura-ni Matchikol jolo, bike bolsako dumper truck gari bolsa salgake a·sel ong·taiaha aro ia a·sel ong·anio bike-ko salgipa mande bilongbee saknaanirangko man·na nangaha.
Kobor on·timgiparangni u·iatani gitade, bike-ko salgipa mandeara, Balachanda songni Rakseng M Sangma ong·achim aro ua somoio ua Tura-chipakna re·baengachim.
Tura-ni Matchikol jolona sokon uni bike-ko Garobadha-chipakna re·angskaenggipa dumper truck gari, ta·rakbee re·angenba salgakaha aro uko salgakani ja·man bike-ko adita chel·kala biaponan salchape katangaha.
Bike-ko salgipa mande, truck garichi salgakako man·e ja·a samsa bilongbee mata bu·ako man·na nangaha aro a·sel ong·ani ja·man uko Tura Civil Hospital-ona ra·angaha.
Dumper truck garini nomborara ML-08K 0925 ong·a aro ia gariko salgipa mandeara, Singimari-oni Kazimuddin minggipa mande ong·a ine kobor on·timgiparang u·iataha.
A·sel ong·ani ja·man truck garini driver, ua biaponi kataha aro ia koborko seatengmiting somoiona kingkingan uko police-rang rim·na man·kujaengachim.
Adita salrangna skangsan, Tura-ni Ballonggre joloba, me·chik bi·sa sakgnini sale re·angenggipa scooty bolsako dumper truck garian salgakahachim aro me·chik bi·sa sakgnionin saksade ja·a samsako gimaatna nangahachim.
Ia a·sel ong·ani ja·man dingtang dingtang dolrang aro Tura jillao songdongenggipa manderangba, dumper truck garirangko iandake skatang salani gimin raken jegalattokaha aro bostu salgipa garirangko salni somoiode Tura jillao napna on·jachina gita District Administration-ko didiatahachim.
Tura jillaosan ong·aigija iandake dumper truck garirangni skatang salanichi Garo Hills-ni dingtang dingtang biaprangoba bang·en a·sel ong·anirangko nikna man·ahachim.