SHILLONG: Sonibar salo East Jaintia Hills a·jani police-rang, gong kror 7.2-ni gram 200-mang ong·gipa heroin samrang baksana mande saksako rim·na man·aha.
Police-rangni u·iatani gitade, ia mandeko Manipur-oni registration nombor donggijagipa gari bolsao Shillong-ona re·baengmiting somoio East Jaintia Hills a·jao rim·aha.
Ia mandeara, Manipur a·dokni Churachandpur a·jao donggipa M Songgel songoni bilsi 36 ong·gipa Nehtinmang Haokip ong·achim aro uko police-rang, Sonibar pring 8:00 bajimango, Ratacherra check post-o rim·na man·aha.
Ia mandeni salbagipa garioniko am·sandion, ge 84 sabon box-rangko man·aha aro ia sabon box-rango ua heroin samrangko chipe ra·baengchim.
Ia a·selni bidingo police-rang, NDPS Act-ni ning·o mokordoma ka·aha aro ning·tubate am·sandianirangko dakengkua ine police-rang u·iataha.