TURA: Purno A Sangma sagi aro uni nokdang, batanggimin bilsi 47-na Garo Hills-o maming namgnirangkon ra·bana man·jaha ine Congress dolni dilgipa Deborah C Marak-ni matnanganirangko National People’s Party (NPP)-ni dilgipa aro a·dokni Cabinet Minister Marcuise N Marak, raken jegalatskaaha.
Congress dolni matnanganirangna aganchakaniko on·angengon, Tura-ni MP ong·engmiting somoirango PA Sangma sagi, Lok Sabha-ni Speaker ong·aha, Union Minister-ba ong·aha aro da·alo Meghalaya a·dokko mingsinganiba uni giminsa ong·aha ine Marak parakataha.
“Meghalaya a·dokna uni on·gilanirangko niatgenchimode an·ching uni bang·en on·gilanirangko nikatna man·aha. Da·alo Garo Hills-ko ba Meghalaya a·dok gimik recognition-ko man·enga ong·ode uan PA Sangma sagini a·selsa ong·aha. Congress dolko dilenggipa Deborah Marak-ni agananiara, ia kamrangko nipilchengani gri Opposition dol ong·ani gimin aganani gitasan ong·aia,” ine NPP-ni dilgipa aganaha.
Jal Jeevan Mission-ni kamrang Garo Hills-o chu·sokgipa ong·jaenga aro central agency-rangchi inquiry-ko dakatna nangenga ine NPP-chi dilenggipa MDA sorkarini kosako matnanganina aganchakaniko on·angskaengon, JJM-ara a·songo pilak nokdangrangnan chi pipe-rangko sokate on·na ma·mong sorkarini ra·gatgipa mission ba kamsa ong·ani gimin namen transparent ong·gipa mission ong·a aro ia mission-o mamingkoba dongnue dakna man·anirang dongja ine Marak parakatskaaha.
“JJM-ni ning·o dingtang dingtang bakrang donga aro badia bakko ua chu·sokja ine matnangenga uko mesoke on·chengna man·ode nambatgen. JJM-ni payment-oba dakgualanina cholrang dongja indide maio pangchake ua JJM-ni kamo ong·gija dakanirang donga ine matnangenga?” ine Marak sing·doataha.
Bangladesh a·songona chini badingsrukani aro Myanmar a·songoniko niam gri badingsrukbaanioba NPP sorkarian jak donga ine Deborah-ni matnanganirangko jegalatskaengon, “Sorkariko chalaianio dingtang dingtang mechanism ba kolrang donga aro a·song damgnini gisepo badingsrukanirangko BSF aro uandakgipa dingtang dingtang dolrang nirokenga. Niam gri badingsrukaniko ia dolrangan nirok sandienga aro bang·a changon niam gri badinggiparangko rim·naba man·enga indiba maio pangchake ua (Deborah) MDA sorkariko matnangenga?” ine NPP-ni working president sing·doataha.
Meghalaya a·dokni tangka paisarangko cha·ue gipin a·dokrangna watatenga ine Deborah-ni matnanganikoba Marak, raken jegalataha aro Arunachal Pradesh a·doko ong·gipa obostani gimin talatanikoba on·ataha.