TURA: Garo Hills-o Garo National Liberation Army-Regroup (GNLA-R) bobil dolko bikottaiaha ine a·kanggipa mande sakgittam, chong·motan Sengsrang N Marak, Thosengcheba A Sangma aro Chijang A Sangma-ko re·anggipa March jani 15 tariko rim·ani ja·man da·o ia bobil dolko bikotdilgipa Simon G Momin-koba police-rang, North Garo Hills a·jani Gambil Apal songoniko rim·na man·aha.
Simon G Momin baksana police-rang, Rakban Ch Momin-koba apsan songoniko rim·na man·aha.
Ia manderangoniko police-rang, Gamexy mobile phone ge·sa, Vivo YO1 mobile phone ge·sa aro Heemax mobile phone ge·sa baksana Sim card ge·gniko man·aha.
Police-rangni u·iatani gitade, GNLA-R-ko bikotdilgipa Simon G Momin, A·chik National Liberation Army (ANLA) aro A·chik Matgrik Elite Force (AMEF) bobil dolrang baksaba bak dongpagipa mande ong·achim.
Ia mandeko batanggimin somoirangoba police-rang, West Khasi Hills a·jao Arms Act-o pangchake aro East Garo Hills a·jaoba tangka dabianina aro mande rim·gittanganina rim·ahachim.
Iani bidingo police-rang, ning·tubate am·sandianirangko dakengkua ine u·iatengon, banoba tangka dabiani ba iandake ong·gija kamrangni bidingo maiba koborrangko man·genchimode police-rangna u·iatchina gita a·dokni manderangko didiataha.
