SHILLONG: Adita salrangna skang, Khasi Hills-ni Ichamati aro Mawlai Mawlong-o dosgri manderangko so·otanina rim·ako man·gipa manderangara sakki gnang aro kakketo pangchake rim·ako man·gipa manderangsa ong·achim aro iani bidingon da·o mitam manderang, so·sojengjeng ong·atani kamrangko ka·na jotton ka·skaenga ine Sukrobar salo, a·dokni Chief Minister Conrad K Sangma talataniko on·angaha.
Shillong songjinmao sorkari aro police-rangni gam-jinrangko so·e galna jotton ka·enggipani bidingo janapatengon, dos dakgipa manderangko police-rang sakki gnang aro kakketko ma·siesa rim·aha aro iandakgipa kamrangko sorkari champengna jotton ka·angkugen ine Chief Minister ku·rachakaniko on·angaha.
“Dos dakgipa manderangni kosako ja·ku de·ahani gimin iandake so·sojengjeng ong·atna jotton ka·giparang donggen ine chinga ma·sisoengachim indiba da·o iandakgipa obostarang batroroangengahani gimin chinga iandakgipa so·sojengjeng ong·atani kamrangko champengna jotton ka·gen,” ine Sangma aganaha.
KSU-ni membor-rangko rim·ani ja·mansa, police aro sorkarini gam-jinrangko petrol bomarangchi godape so·sojengjeng ong·atna a·bachengaha ine talataniko on·angengon, “Dos donggipa manderangko rim·ani ja·mansa ia a·selrang ong·enga indiba sakki aro kakketko ma·sichenggijade chinga darangkoba biming mingna man·kujawa,” ine Chief Minister aganaha.
Batanggimin somoirango jekai sakki aro kakket baksa dos dakgipa manderangko rim·ahachim, apsan daken mikkangchiba dos dakgipa manderangni kosako sakki gnang aro kakketo pangchakesa ja·kurangko de·anggen ineba ua aganaha.
“Darangba niamko jaktango ra·na bil dongja aro police-ba niamo pangchake, saoba niamko jaktango ra·genchimode ja·kuko de·na bil donga. Uni gimin ian badiaba dol ba mandeni kam inede aganjaenga indiba dos dakgipa mandeni kosako niamo pangchake ja·kuko de·angaigen,” ine Chief Minister parakataha.
Wa·al so·chipna jotton ka·gipa manderangko maini gimin rim·kujaenga ine sing·anina aganchakaniko on·angskaengon, “Sakkirango pangchakesa dos dakgipa manderangko rim·na nanga aro saniba aganaiani giminde chinga darangkoba rim·na man·ja. Chingna CCTV ba uandakgipa video recording-rangko sakkina nangenga indiba da·o dipet chinga iandakgipa sakkirangko man·kujaenga,” ine Sangma aganaha.