SHILLONG: Shillong songjinmani Barik-o donggipa PWD (Buildings)-ni quarter-rangko pe·galenba ia biapko parking lot aro dingtang dingtang biap dake tariskana miksongengani gimin PWD (Buildings)-ni quarter-rango donggipa staff-rangko July 1 tarikni gisepon wate on·china department u·iataha.
Ia biapo a·songni nisankoba metre 50 chue songdona sienga.
PWD (Buildings)-ni quarter-rango dongchakenggipa chowkidar sakchet aro driver saksana re·anggipa May-ni 1 tarikon department, u·iataniko on·ataha.
“Na·simangko 01.07.2024-ni gisepon quarter-rangko wate on·china aro bangki gamna nanganirang dongkuenga ong·ode gamchina gita u·iatenga. Quarter-ko watani ja·man chabiko PWD (B) Sub Division No II-ni Assistant Executive Engineer-ni jako on·china gitaba u·iatenga,” ine PWD (B)-ni quarter-rango dongchakenggipa manderangna seatgipa chittio janapataha.
Koborko on·ani gitade, Barik point-o donggipa sorkarini a·ara General Administration Department (GAD)-ni a·arangsa ong·achim.
Shillong songjinmani apchangket ong·aniko namatna gita sorkari kamrangko ka·engachim ine nikna man·a.
Chief Minister Conrad K Sangma-ni parakatani gitade, skanggipa bako, jakkalgija donenggipa sorkarini bang·a a·arangkon Urban Affairs department-na pakwatatmanaha.
PWD office-ko Barik point-oniko gipin biapona apjitangna gita miksonganirang donga ineba ua aganaha.
Barik point-o donggipa sorkari bungalow-ko parking lot-na jakkalskagen ineba Chief Minister parakataha.