RESUBELPARA: Cancer saaniko seng·gnang porikka ra·e nina nanganiko manderangna u·iatna gita Sombar salo, cancer screening aro awareness program-ko North Garo Hills a·jani Resubelpara Community Health Centre-o salsana ong·atangaha.
Ia program-ko ong·atanio, Meghalaya State Cancer Society-ni State Nodal Officer Dr Anisha Mawlong, jinmana aganprakangengon, cancer saaniko seng·gnang porikka ra·e nina nangani aro chel·chakanirangko agan-talate on·angaha.
Cancer saaniko porikka ra·e nina gitasa ia program-ko ong·atenga ine janapatengon, cancer saaniko seng·gnang ma·sienba sangenchimode saaniko namatpilna man·ani cholrangba donga ine Dr Mawlong aganaha. Ian a·doko cancer saaniko komiatna aro cancer saaniko man·e sianiko komiatna miksonge ra·gatgipa program ong·a ineba ua aganaha.
India a·songo Meghalaya a·dokan cancer saanio skanggipa nombor ong·enga ine janapatengon, iani giminsa manderangna cancer saani chinrang, dakna nanggni aro nanggijanirang aro hospital-rangona re·bae porikka ra·e nina nangani bidingo u·iatna nangchongmotenga ine Dr Mawlong parakataha.
Dr Mawlong-ni aganani gitade, da·o dipet Meghalaya a·doko cancer sagiparangko Shillong Civil Hospital, NEIGRIHMS aro Tura Civil Hospital-o sanna bananirangko on·enga.
Meghalaya a·doko cancer sagiparang batroroengani gimin am·sandianirangko dakon, a·doko gue cha·giparang aro ta·makku jakkalgiparang bang·batani a·selsa ong·enga ine ma·sina man·aha ineba Dr Mawlong aganaha.
Indake ong·genchimoba cancer saanina kenjachina aro hospital-rangona re·bae an·tangtangko porikka ra·e nichina gita Dr Mawlong, manderangko didiangaha.
Ia program-ko ong·atanio, Resubelpara CHC-ni Senior Medical & Health Officer Dr Rezia K Sangma-ba cancer saani bidingo manderangna agan-talatanirangko on·angaha.
Ia program-ko ong·atanio songni nokni manderang, cancer saanina porikkarangko ra·e nina gitaba cholrangko man·aha.