TURA: Rongsak police outpost-ni UBSI saksa, ku·mitdu ra·a ine matnangenba, ia police officer-ni kosako Williamnagar jolo donggipa Chachatgre songni mande saksa, Meghalaya a·dokni Director General of Police (DGP)-na badi ka·doataha.
DGP-na badi ka·doanggipa Clever T Sangma-ni parakatani gitade, re·anggipa 2023 bilsini April 5 tariko, saksa Terot T Sangma minggipa mande baksa uni ripengrang uko kragija dake dokahani gimin ua Rongsak police outpost-ona re·ange badi ka·eahachim indiba ia police outpost-ni UBSI, uoniko tangka paisarangko bi·skaahachim.
Uni badi ka·ani gita dos dakgipa manderangko ta·raken rim·gen ine police officer, una ku·rachakahani gimin ua, Rongsak police outpost-ni UBSI-na changgni dake, gimik gong 12,000 tangkarangko on·ahachim indiba ia police officer, dos dakgipa manderangni kosako maming ja·kurangko de·jaha ine Clever Sangma, DGP-na badi ka·anio parakataha.
Iandake manderangoniko ku·mitdu bi·e ra·ahani gimin ia police officer-ni kosako rakgipa ja·kurangko de·china gitaba ua, a·dokni DGP-ko didiataha.
