TURA: Ia bilsini Higher Secondary School Leaving Certificate (HSSLC) Science aro Commerce porikkarangko seanio Garo Hills-ni dambonga a·jarangon 70 percent batahani gimin batanggimin bilsirangona bate nambatkalaha.
Ia bilsio Garo Hills gimikoni sak 968 chatro chatrirang, HSSLC Science porikkako seaha aro ianoni sak 732 chatro chatrirang pass ong·e, pass ka·ani percentage gimikchi 75.61 percent gapaha. Commerce stream-o Garo Hills gimikoni sak 385 chatro chatrirang seskaaha aro ianoni sak 285 chatro chatrirang chu·sokgipa ong·e, pass ka·ani percentage 71.42 percent gapskaaha.
South West Garo Hills a·jao Science porikkako segipa gimik sak 31 chatro chatrirangan pass ka·gopaha aro ian a·ja gimikna mikkim rasongko ra·baaniba ong·aha. South West Garo Hills a·jao Commerce porikkako sak 15 chatro chatrirang seahachim aro ianoni sak 9 chatro chatrirang pass ka·skaaha.
West Garo Hills a·jao gimik sak 642 chatro chatrirang Science porikkako seaha aro ianoni sak 485 pass ka·e, pass percentage 75.54 percent gapaha. Commerce-koba West Garo Hills a·jao sak 247 chatro chatrirang seaha aro ianoni sak 169 pass ka·e, pass percentage 68.42 percent gapaha.
East Garo Hills a·jao sak 149 chatro chatrirang Science porikkako seskaaha aro ianoni sak 102 chatro chatrirang pass ong·aha. Commerce porikkako sak 78 chatro chatrirang seaoni sak 62 chatro chatrirang chu·sokgipa ong·skana man·aha.
North Garo Hills a·jaoba sak 72 chatro chatrirang Science porikkako see gimik sak 60 chatro chatrirang pass ka·na man·aha. Commerce-ko North Garo Hills-o sak 45 chatro chatrirang seaha aro sak 35 pass ka·na man·aha.
South Garo Hills a·jao gimik sak 74 chatro chatrirang Science porikkako see sak 54 chatro chatrirang chu·sokgipa ong·aha indiba Commerce porikkako segiparangde dongskajaha.
