SHILLONG: Dingtang dingtang kamrangko ka·anio kamrang namjani gimin ‘blacklist’ ka·a man·gipa ARSS Infrastructure Project Ltd company-na Garo Hills-o kamrangko on·kuenga ine Tura-ni MDC aro BJP-ni state vice president Bernard N Marak, NPP-chi dilenggipa MDA sorkarini kosako matnangengon, ARSS company-na a·dok sorkaride kamrangko on·gipa ong·jani gimin iani bidingo mamingkoba aganna ba dakna man·jawa ine a·dokni Deputy Chief Minister aro PWD (Roads) Minister Prestone Tynsong aganchakaniko on·atskaaha.
Tynsong-ni parakatani gitade, National Highway (NH-51) rama tariani kamrangko Road Transport & Highways Ministry-sa National Highway Infrastructure Corporation Limited (NHIDCL) gita ka·atenga aro iano a·dok sorkaride maming bak dongpajahachim.
“A·dok sorkarini kamde a·arangko NHIDCL-na pakwate on·anisan ong·aiani gimin iani bidingo mamingkoba dakpana man·jawa. ARSS company-ara blacklist ka·a man·gipa company ong·ama ong·ja ukoba anga an·tangde ma·sija,” ine Tynsong aganaha.
Iani bidingo New Delhi-ona re·ange Union Ministry baksa talbate ra·echina gitaba ua Tura-ni MDC aro BJP-ni state vice president-ko didiataha.
Kam ka·anirang namjani gimin ‘blacklist’ ka·a man·gipa ARSS company maikai Garo Hills-o kamrangko ka·na man·skaenga ine adita salrangna skangsan, Tura-ni MDC Bernard N Marak sing·doatenba, iani bidingo seachi aganchakaniko on·china gita a·dokni Chief Minister Conrad K Sangma-na sedoatahachim ine nikna man·a.
Marak-ni parakatani gitade, National Highway (NH-51) ramako matchotatna gita Manoranjan Company-nasa on·chengahachim indiba ia company somoi gita kamrangko matchotatna man·jahani gimin ja·mano kamrangko Shubham minggipa company-na on·skaahachim indiba ia company-ara ARSS company-ni apsan manderangchi ka·enggipa company-an ong·skaachim.