SHILLONG: Office-o jakkalna on·gipa garini registration nombor-ko jakkalsreta ine a·dokni Director General of Police (DGP) LR Bishnoi-ni kosako badi ka·aniko sandirokna a·bachengataha ine Sukrobar salo, a·dokni Deputy Chief Minister aro Home Minister Prestone Tynsong parakataha.
Iani bidingo mamingkoba aganpana gita jechakatengon, jeni giminan DGP-ni kosako badi ka·ahachim, iako niamo pangchake sandirokna on·na nanga aro niam gita kamrangko ka·na on·na nanga ine Tynsong parakataha.
“Saniba kosako maiba kamrangni gimin FIR ka·a ong·ode chinga uko niatna gita nangchongmota. Iani bidingo FIR ka·ahani gimin chinga mokordomako segataha,” ine Tynsong aganaha.
DGP-ni kosako mai ja·kurangko de·gen, uarangni giminba ua mamingkoba aganna gita jechakaha indiba iani bidingo sandirokanirangko a·bachengataha aro sandirokaniko matchotani ja·man kacharisa nanga gita ja·kurangkode de·angaigen ine Home Minister parakataha.
Inquiry committee-ni kosako badi ka·ani giminba ua mamingkoba aganna gita jechakatengon, ian da·o dipet kacharini ning·osa ong·kuenga ine Tynsong aganaha.
Meghalaya a·dokni Director General of Police (DGP) Lajja Ram Bishnoi-na office-o jakkalna on·gipa garini bidingo kamoniko dontongata man·gipa Meghalaya Police-ni gitcham Assistant Inspector General (AIG) Gabriel Iangrai, FIR ka·doangahachim.
Gitcham AIG Iangrai-ni badi ka·doangani gitade, re·anggipa 2023 bilsio uni RTI ka·e am·sandion, inquiry committee-ni janapgipa Hyundai Verna gariko Transport Department-o register ka·e ML-02A 0001 registration nombor plate-ko man·aha aro iakon DGP-na office-ni kamna on·ahachim ine ma·sina man·ahachim.
2022 bilsio, Meghalaya a·dokni DGP ong·e kamko jako ra·na re·bachengani somoio DGP Bishnoi, Assam sorkario register ka·gipa gipok Kia Carnival Limousine model gariosa re·baahachim indiba da·o ua ia gario, Verna Hyundai-na register ka·gipa ML-02A 0001 nomborkon jakkalskaenga ineba Iangrai matnangatahachim.