SHILLONG: Lok Sabha election-ni counting ba channaniko re·baenggipa June 4 tariko dakna siengani gimin ua somoo manderang bang·e dongpaaniko komiatna Section 144 CrPC-ko ra·gatgen aro counting matchotani ja·man chegipa dolrangba jinma re·jomna on·jawa ine Shillong Parliamentary Constituency-ni Returning Officer aro East Khasi Hills a·jani Deputy Commissioner SC Sadhu parakataha.
“Vote chanchakram biapo manderangni jinma tom·dakaniko champengna aro matchotani ja·man chegipa dolrangni jinma re·jomaniko champengna gita chinga Section 144-ko ra·gatgen,” ine East Khasi Hills a·jani Deputy Commissioner parakataha.
Counting centre-o maming so·sojengjeng ong·ani ba golmal gondogol ong·anirang dongjana gita District Administration, video surveillance gita centre-ni wilwilao donggipa pilak biaprangkon mikrake nirikkigen ineba Sadhu parakataha.
Deputy Commissioner-ni parakatani gitade, manderangna kakket result-rangko mesoke on·na man·na gita Information & Public Relations department, Shillong songjinmani dingtang dingtang biaprango screen-rangko dongen aro ia screen-rango election-ni result-rangko manderangna mesokatgen.
Vote-rangko chanani somoio chel·chakanirangko donatani bidingo janapatskaengon, vote-rangko chanani somoiona ma·mongni sipai dolrangko bi·dapatna nangjawa aro da·o dongenggipa sipai dolrangkon donataigen ine Sadhu parakataha.
“Assembly election-rango gitan ia chang Lok Sabha election-oba so·sojengjeng ong·anirangko chel·chakna gita chinga chee re·jomanirangko dakna on·jawa. Counting centre-ni a·palrangoba chinga manderangna chong·mot result-rangko mesokatna screen-rangko dongen,” ine Shillomg Parliamentary Constituency-ni Returning Officer parakataha.
Counting-ni somoio tom·tomaniko rakkiangchina gita vote-rangko channa sal 10 skangan district administration, dingtang dingtang political dolrang baksa tom·aniko ong·atanggen ineba Sadhu parakataha.