TURA: East Garo Hills a·jani Nengmandalgre-o PMGSY scheme-ni dolong damsako name tarija ine A·chik Progressive Approach (APA) dol, ia dolongko rikgipa JC Infra Corporation Limited company-ko matnangataha.
APA-ni parakatani gitade, ia PMGSY-ni dolongara, Nengmandalgre-oni Mandalgre songona dakanggipa ramao ong·achim aro ia dolongko name rikjani a·sel ia dolongko rika matchotkujaon be·srianirangko nikna man·engahachim.
“Jolo songdongenggipa manderangni badi ka·aniko man·soenba chinga ia dolongko nina re·angon, ia dolongo be·srianirangko nikna man·aha indiba uamang ia be·srigipa bakrangko bitumen-rangchi nongdapenba dongnuna jotton ka·ahachim. Da·o dipet chinga ia dolongosan be·srianirangko nikna man·aha indiba mikkarang waangkuahaode ia rama aro gipin dolongrangba apsan daken nosto ong·pilani cholrang donga,” ine APA-ni dilgipa Francis Marak parakataha.
Ia dolongrangko name tarigijaniara ia dolongko rikgipa JC Infra Corporation Limited company-ni tangka paisana mikpakma nie kam ka·aniko mesokanisa ong·aha ineba APA matnangataha.
Mikkangchiba uamang dingtang dingtang rama jal·langrangko am·sandiangkugen aro iandake kam ka·enggipa contractor aro company-rangni kosako kachario badi ka·doanggen ineba Marak mikrakataniko on·ataha.
