SHILLONG: Meghalaya a·doko niam gri koela bikotanichi nosto ka·a man·gipa samtangtangko tangatpilna kam ka·anirango, Meghalaya Environment Protection & Restoration Fund (MEPRF)-ni chamgipa mitam project-rangna agrede maming namdapatanirangko nikna man·jaenga ine Justice (retd) BP Katakey-ni dilenggipa single member committee-ni chang 22-gipa interim report-o parakaha.
MEPRF-o man·enggipa gong kror 400 aro Central Pollution Control Board-o man·enggipa gong kror 100-na batgipa project-rangni gimin janapatengon, samtangtango ong·telaigiparangko tangatpilna kam ka·anio department-rang namdapatanirangko dakna nangenga ine ia committee parakataha.
Je biaprangon niam gri koelarangko bikote da·onaba ia koela a·kolrangko dappilkujaengachim, ia koela a·kolrangoni acid-rang joksrubaengani a·sel ia jolrango songdongenggipa manderang neng·nikanirangko chagrongna nangtokenga ineba committee parakataha.
Koela so·gipa karkanarango jakkalgipa koelarangni bidingo audit ka·aniko janapatskaengon, ia audit-ko da·o matchotsrangkujaenga indiba Audit Committee-ni u·iatanio pangchake antigittamni gisepon matchotna ka·dongenga ine committee-ni interim report-o parakaha.
A·dokni dingtang dingtang a·jarango cho·gimin koela a·kolrang dongama dongja uko drone-chi am·sandina gita kamrangko da·o dipet a·bachengkujaengani gimin hisap man·gimin koelarangko donsogimin depot-rangona salruraani da·o dipet matchotkujaenga ineba single-committee-ni interim report-o parakataha.
Hisapman·gimin koelarangko Coal India Limited-ni donsogimin depot-rangona salani matchotahaon, a·dokni dingtang dingtang biaprango cho·gimin koela a·kolrang dongama dongja uko drone-rangchi am·sandichina gita committee, ku·pattianiko on·angahachim.
National Green Tribunal-ni champengatani ja·man niam gri koela bikotgipa a·kolrang dongama dongja uko nina aro Mines & Mineralsa (Development & Regulation) Act 1957-ni dongimin niamrango pangchake iandakgipa koelarangko rim·na committee, ia ku·pattianiko on·angaha.
