SHILLONG: Meghalaya a·dokni private skul aro college-rango nangana bate rakdugae fee-rangko ra·enga ine badi ka·anirangko man·soahani gimin iandakgipa institute-rangna fee-rangko apsan ong·e tarie on·na man·na gita dingtangmancha committee ba bimangko songchina Khasi Students Union (KSU) dabiangaha.
2014 bilsini Common University Entrance Test-Under Graduate (CUET-UG) porikkani result-rangko parakna skangan Shillong songjimao mingsingkalgipa college-rangde admission form-rangko palsamsoengaha ine koborrangko man·soahani gimin dingtangmancha committee-ko songchina KSU, a·dok sorkario dabiangaha.
Iani bidingo kobor ra·timgipa manderang baksa agangrikengon, lekka poraniko bading chiwalani kam dake ra·anikode KSU pangnan jegalenga aro iani bidingo a·bachengonin ku·rangko on·enga ine Sombar salo, KSU-ni general secretary Donald V Thabah parakataha.
Thabah-ni aganani gitade, Delhi, Tamil Nadu aro Maharashtra a·dokrangode private institute-rango admission fee, tuition fee, lekka ki·tap aro gipin fee-rangko nirokna gita regulatory body-rang donga.
Meghalaya a·doko lekka porani kamrangko bading chiwalani dake ra·engani a·sel kangal cholgri ong·pagipa chatro chatrirangde neng·nikanirangko chagrongna nangtokenga ineba KSU-ni general secretary parakataha.
Iandakgipa institute-rangna a·dok sorkari niamrangko donjagenchimode BPL aro kangal cholgri ong·gipa chatro chatrirangde chubata gadangrango poraipana chol ong·jawa ineba Thabah aganaha.