TURA: Meghalaya a·doko Common University Entrance Test (CUET) porikkako seenggipa chatro chatrirang, an·tangtangko nambate tarisamsona man·na gita porikka ra·na skang chatro chatrirangna Mock Test ba dake niani porikkako ong·atchina A·chik Conscious Holistically Integrated Krima (ACHIK) dol dabiangaha.
ACHIK dolni parakatani gitade, CUET porikkara India a·songni ning·o donggipa central university-rango undergraduate (UG) aro post-graduate (PG)-na admission-ko ra·na gita National Testing Agency (NTA)-ni ra·enggipa national level entrance exam-sa ong·ani gimin namen susana nanggipa porikka ong·a aro chatro chatrirang, ia porikkako namgipa result-ko man·na gitade, porikkana skang an·tangtangko name tarisamsona nangengachim.
“Uni gimin ia porikkana tarisamsona gitade chatro chatrirangna mock test-ko ra·anian nangchongmotgipa ong·enga maina mock test-ko ra·anichisa chatro chatrirang, porikka ra·ani bewal, somoi nangani aro maidakgipa question-rangko ra·a, uarangko ma·sisona man·gen,” ine ACHIK dol parakataha.
“Bang·bata chatro chatrirangan CUET porikka ra·ani bewalko ma·sitokjae porikkako seanio jajaani aro roll number-rangko gapatanioba jajaanirang ong·kataha. Uni gimin CUET porikkako seenggipa chatro chatrirangna Mock Test-ko ong·attelna nangenga,” ine ACHIK dolni president parakataha.
Meghalaya a·dokoba skanggipa changna CUET porikkako May 15 tarikoni ong·atengachim aro ia porikkako Garo Hills-oba sak 5000-na baten setokahachim.