TURA: Wachi kari sokbaengahani gimin dongimin niamrango pangchake, mikkarang jime waangahaon Ganol SHP Concrete dam-ni namgnina, ia dam-ni chirangko wate galna gita Sluice Radial Gate-rangko je somoioba kulina nangnaba gnang ine Ganol Civil Division-I, Tura Rongkhon-ni Executive Engineer u·iataha.
Ia Ganol dam-ni gate-rangko kuliahaon rang·san chirang dal·angnaba gnang ine ia Ganol dam-ni ka·mao songdong a·chaenggipa manderangko ba ia dam-ni ka·ma jolrango kam ka·enggipa manderang pilakkon Ganol chirikamrango rojachina ba kamrangko ka·jachina gita Executive Engineer mol·molataha. Man·a dipetde Ganol dam-ni chirangko ia gate-rangko kuligija watna jotton ka·anggen ineba ua u·iataha.