SHILLONG: Meghalaya a·dokni skotong Shillong songjinmao songdongenggipa A·chikrangni gitcham gopram da·o biaprang chakangjaengahani gimin gital biapko on·china gita All India Garo Union (AIGU), a·dokni Chief Minister Conrad K Sangma-ko didiataha.
Iani bidingo Chief Minister-na sedoatengon, Shillong songjinmao songdongkamgipa A·chik nokdangrang hajalni hajal donga aro unbaksana Shillong-o kam ka·enggipa, poraienggipa aro hajira kam ka·e cha·enggipa A·chikrangba bang·en donga indiba A·chikrangna Ganesh Das Hospital sambao on·gipa gopram da·o biaprang chakangjaengahani gimin mande siani somoirango A·chikrang neng·nikanirangko man·na nangengaha ine AIGU parakatenba, ia neng·nikaniko chel·chakna gita biap gitalko gopram dakna on·china ine Chief Minister-ko mol·molataha.
Dingtang dingtang sorkari department-rango kam ka·enggiparangna chu·onga gita quarter-rangko on·china gitaba AIGU, a·dokni Chief Minister-ko didiataha.
AIGU-ni parakatani gitade, badiaba badiaba department-rango dongchakani quarter-rang dongjani a·sel kam ka·giparang, nokrangko para ra·esa dongna nangtokenga aro uandaken office-ona re·anio, traffic jam-rangko chagrongna nange bang·bata somoirangon somoi gita office-rangona sokna man·rongjaengachim.
“Chingni sing·sandie nianio office-rango kam ka·giparangni somoi gita office-rangona sokna man·gijani mingsa a·selde office quarter-rang dongjani a·selba ong·enga ine chinga ma·sina man·aha, uni gimin pilak sorkari department-rangon kam ka·giparangna quarter-rangko on·na man·genchimode kam ka·giparangni neng·nikanirangko bewalde komiatna man·genchim,” ine Chief Minister-na sedoatgipa chittio AIGU parakataha.
Indake ong·engon, Meghalaya Civil Secretariat-ni Grade IV casual employee-rang, jemangan niam gita seokako man·enba bilsi 10-na kamko ka·soahachim, uandakgipa manderangni kamrangko regularize ka·china gitaba AIGU, a·dokni Chief Minister-ko didiataha.
Indake AIGU Secretary General Diplu G Momin-ni parakatani gitade, Chief Minister Conrad Sangma, uamangni dabianirangko nirokatna gita ku·rachakataha.
