TURA: Garo Hills-o buring-bolgrimrangko ripingani bidingo manderangna didianiko on·na gita Meghalaya Chief Minister Conrad K. Sangma Bristibaro West Garo Hills-ni Nokrek Biosphere Reserve-ni mikkangchakgipa songrangona wenangenba songni-nokni manderang baksa agangrikangaha.
Principal Secretary Sampath Kumar-ni dilanio, Forest aro Environment Department, Meghalaya Basin Development Authority (MBDA)-ni a·gipi official-rang, aro Council of Nokmas-ni memborrang Chief Minister baksa re·angchapaha, Chief Minister Conrad K. Sangma, Sakalgre, Baladinggre, aro Sakal Aduma songrangona wenangaha.
Ua, kontadokmang ong·nasipile song damgittamo somoiko re·ataha aro Ganol catchment area-ni Nokmarang baksa chanchirimaniko dakangaha. Nokrek-oni jokonbagipa Ganol Chibima-an, Tura aro uni gipin mikkangchakgipa biaprangna chini ja·pang ong·a.
Songni nokmarang baksa Sakal Aduma songo tom·e chanchirimangengon, songo noko donggipa chibisikrangko tangatpilna gita buring bolgrimrangko ripingna a·dok sorkari, dingtang dingtang program-rangko a·bachengataha aro ia program-rangoni mingsade Payment for Ecosystem Service (PES) program ong·a ine Chief Minister talate on·angaha.
PES-ni gimin talataniko on·angengon, ia program-ni ning·o songni nokni manderangna, buring bolgrimrangko ripingna hectare-prakon gong 15,000 ka·e tangkarangko on·enga ine Chief Minister parakataha.
Buring bolgrim aro chiring chibisikrangko tange rakkianio songni nokni manderang baksa ku·monge kamrangko ka·na sorkarini ja·ku de·ani giminba ia tom·anio Sangma talate on·angaha.
Songo noko a·ba o·e cha·aniko dontongna nangengani gimin janapangskaengon, “Songni manderangna pangkamgipa janggi tangani cholrangko on·na sorkari, dingtang dingtang program-rangko a·bachengataha aro iana Forest, Agriculture, Horticulture aro Soil & Water Conservation department-rang nangrime kamrangko ka·enga,” ine Chief Minister aganaha.
Nokrek a·brini wilwilao tourism-ko tang·doatani giminba ia tom·anio Chief Minister, songni nokmarang baksa chanchirimdilangaha aro batanggimin bilsigni ba gittamni gisepon Nokrek a·bri jolrango tourism-ko tang·doatna gita dingtang dingtang kamrangko a·bachengataha ine parakataha.
Buring bolgrimrangkosan ripingaigija Ganol chibisikko chel·chakanio sorkari baksa bakrimchina gitaba ua songni nokmarangko didiangaha.