TURA: Secondary School Leaving Certificate (SSLC) aro Higher Secondary School Leaving Certficate (HSSLC) Arts porikkani result-rangko Sukrobar salo Meghalaya Board of School Education (MBOSE) parakataha aro re·anggipa bilsio gitan ia bilsini SSLC porikkaoba Tura-ni Sherwood School, Top 20-ni skanggipa biapko man·e Garo Hills-na mikkim rasongko ra·bataiaha.
Ia bilsini SSLC porikkao Garo Hills-oni gimik saksku chatro chatrirang, Top 20-o biapko man·e chu·sokgipa ong·aha aro uamangara Top 20-ni skanggipa biapo Sherwood School-ni Anuj Chetri (575 marks), brigipao St Xavier’s HS School-ni Aime Azora G Momin (568 marks) aro Mendipathar St Thomas HS School-ni Wanma Sangma (568), dokgipao Sherwood School-ni Ayumi M Momin (565 marks), skugipao Tura Aeroville HS School-ni Obadiah Namaan B Sangma (557 marks), 11-gipao Tura Don Bosco HS School-ni Dechro M Marak (555 marks), 14-gipa Tura Aeroville HS School-ni Eva Amareen A Sangma (550 marks), 19-gipao Tura Sherwood School-ni Arunav Kumar Paul (545 marks) aro 20-gipao Tura Christian Girls HS School-ni Lillian Christiano B Marak (544 marks) ong·a.
Ia chang SSLC porikkako Garo Hills gimikoni sak 24,527 chatro chatrirang seahachim aro ianoni sak 8797 chatro chatrirang chu·sokgipa ong·na man·aha.
SSLC porikkao district-ni gita pass ka·ani percentage-ranga East Garo Hills-o 39.95%, West Garo Hills-o 42.66%, South Garo Hills-o 35.26%, East Khasi Hills-o 77.09%, West Khasi Hills-o 65.79%, Ri Bhoi-o 59.75%, South West Garo Hills-o 28.41%, North Garo Hills-o 23.88%, South West Khasi Hills-o 62.54%, East Jaintia Hills-o 70.88%, Eastern West Khasi Hills-o 72.65% aro West Jaintia Hills-o 78.34% ong·aha.
Apsan salon, HSSLC Arts porikkakoba MBOSE parakataha aro ia chang HSSLC Arts-oba Garo Hills-oni chatro chatri sakgni Top 10-o biapko man·rikpaaha.
HSSLC Arts porikkao Top 10-ni skanggipa biapko Shillong St Anthony’s HS School-ni Menangmankhraw Kharkongor aro St Edmund’s HS School-ni Gaurav Bharali, 468 marks-rangko man·e sualgrikaha indiba gnigipa biapko Tura Don Bosco College (Hr. Sec. Section)-ni Tanisha Das (451 marks) aro gittamgipa biapko Tura Don Bosco College (Hr. Sec Section)-ni Salseng Marak (450 marks) man·rikskaaha.
HSSLC Arts porikkao district-ni gita pass ka·ani percentage-ranga East Garo Hills-o 67.30%, West Garo Hills-o 65.60%, South Garo Hills-o 56.30%, East Khasi Hills-o 89.96%, West Khasi Hills-o 87.66%, Ri Bhoi-o 81.39%, South West Garo Hills-o 71.47%, North Garo Hills-o 68.44%, South West Khasi Hills-o 75.70%, East Jaintia Hills-o 79.45%, Eastern West Khasi Hills-o 92.32% aro West Jaintia Hills-o 81.79% ong·skaaha.
