TURA: Bay of Bengal-o ‘Remal’ balminduri balengani gimin ian salgrochipaknaba balbae, Garo Hills-oba nangchakeaniko ra·baaha aro uandaken Sombar salo, Garo Hills-ni bang·bata biaprangon mikkarang dontonggija waangan baksana balwaba ta·raken balangaha.
Mikkarang Robibar attamonin wana gita a·bachengaha aro Sombar salode salgimikan Garo Hills gimikon mikka dontonggija waangaha.
Tura-oba mikka baksana balwarang ta·raken balangahani a·sel badiaba badiaba biaprango dal·dalgipa bolrangni be·anirangko nikna man·aha aro uandaken manderang, mitamde nok-jam, gari gora, bagan bari aro ma·manti gam-jinrang nosto ka·ako man·enba noksan ong·na nangtokaha.
Sombar walonisa balmindurirang bilongbatangnaba gnang inenba gittimtangtango donggipa kutcha nokni manderangko, skul nokrango ba community hall-rango ma·chakatchengchina gita District Administration, dingtang dingtang gittimni Development committee-rangna ge·etaniko on·ataha.
Mongolbar salo obostarang namjabatani cholrang donga ine IMD-oni mikrakatanirangkoba man·ahani gimin Garo Hills gimikon skul aro college-rangkoba chutti watchina ge·etaniko on·ataha.
Dakchakanirangko nangenggipa manderangna dakchakanirangko on·na gita district ge·antion Incidence Response Team (IRT)-rangkoba songaha aro ia dolni manderangko konta 24 mikrake dongchina a·jatangtangni district administration ge·etaniko on·angaha.