SHILLONG: Adita salrangna skang, All India Garo Union (AIGU)-ni gital dilgiparangko seoka ine badiaba badiaba songbadrango seaniko AIGU Hq Shillong-oni raken jegalatenba, da·o dipet AIGU-ni general conference-kon ong·atna man·kujaengani gimin gital dilgiparangko seokani kattade nakatja ine talataniko on·angaha.
Iani bidingo AIGU Hq Shillong-ni secretary general WM Sangma-ni u·iatani gitade, tangka paisani gita neng·nikanirangko chagrongna nangkuengani gimin gital office bearer-rangko seokna gita AIGU-ni general conference-ko ong·atna man·kujaenga aro AIGU-ni gital dilgiparangko seoka ine songbadrango seaniara ma·sisretani a·selsa ong·aha.
Indake ong·engon, AIGU-ni gital office bearer-rangko seokna gita AIGU-ni general conference-ko re·baenggipa July jani 3 tarik pring 9:00 bajioni attam 5:00 bajiona, Shillong songjinmani Bishop Cotton Road-o donggipa Garo Union Secondary School-o ong·atenga ine AIGU Hq Shillong-ni secretary general, union-ni pilak membor-rangnan u·iataha.