SHILLONG: Meghalaya a·doko skanggipa changna Common University Entrance Test (CUET)-ko seanio adita neng·nikanirangko chagrongna nangahani gimin a·dok sorkarini mol·molatani ja·man ma·mong sorkari, ia bilsioba Meghalaya a·dokko CUET-oniko wattaiaha.
Iani bidingo a·dokni Chief Minister Conrad K Sangma, social media-o jinmana parakataha.
Meghalaya a·dok baksana Nagaland a·dokkoba ia bilsini CUET-oniko ma·mong sorkari wataha.
“Meghalaya a·dokni central university-rango admission ra·na gita a·dokni chatro chatrirangko ma·mong sorkari, CUET-oniko wataha ine anga an·chingni chatro chatrirangna parakatna kusi ong·a. Iani bidingo anga Union Education Minister Dharmendra Pradhan-ko uni dakchakanirangna aro ma·sichakanina mittelpilna ska,” ine ‘X’ social media-o Chief Minister parakataha.
Ia changoba Meghalaya a·dokko CUET-oniko watahani gimin undergraduate aro graduate course-rangna NEHU gita dakgipa central university-rango admission ra·na nangenggipa chatro chatrirangna rang·speaniko on·ani gita ong·aha.
Indake ong·engon, ia 2024 bilsini CUET-oniko Meghalaya a·dokko watahani gimin Hynniewtrep Integrated Territorial Organisation (HITO) dol, a·dok sorkariko mittelpilataha.
Iani bidingo a·dokni Chief Minister Conrad Sangma-na sedoatengon, “A·dok sorkarini ka·sachake jotton ka·anichi a·doko poraienggipa chatro chatrirangni namgnina ia kamko chu·sokatahani gimin chinga nang·ko mittelpilna ska. A·doko NTA-ni tarisamsoanirang chu·ongjahani a·sel CUET porikkako seanio chatro chatrirang neng·nikanirangko chagrongna nangtokahachim indiba da·alo a·dokko CUET-oniko wataniara iana ka·oksie sengsoenggipa chatro chatrirangna pattiani ong·aha,” ine HITO-ni president Donbok Dkhar parakataha.
Re·baenggipa 2025 bilsio CUET porikkako nambate ra·na man·na gita tarisamsona pilak nanga department-rangna ge·etaniko on·chinaba HITO-ni president, a·dokni Chief Minister-ko didiataha.