Monday, July 22, 2024
spot_img

Garo Hills-o World Environment Day-ko manianga

Date:

Share post:

spot_img
spot_img

TURA: Pangna bilsi manirongbaenga gitan mijal June-ni 5 tarikoba World Environment Day-ko Garo Hills-ni dingtang dingtang biaprango maniangtokaha aro ia salko maniani bak gita bol ge·anirangko, jinma rongtal an·talatanirangko aro dingtang dingtang program-rangko ong·atangtokaha.

South Garo Hills a·jao ia World Environment Day-ko Baghmara-ni Rangku Memorial Girls Secondary School-o maniangaha aro ia salko manianio, South Garo Hills a·jani Additional Deputy Commissioner PR Sangma, mongsonggipa sokgipa ong·e bak ra·angaha.

Ia tom·anio ua jinmana aganprakangengon, skatang bol wa·arangko den·engani a·sel aro a·barangko o·e cha·engani a·sel buring bolgrimrang porongrong ong·roroangengaha ine buring bolgrimrangko ripinge rakkina gita pilakkon bakrime kam ka·china didiangaha.

Bolrangko ge·daproroanichisa china neng·nikanirangko chel·chakna man·gen ineba Sangma aganaha.

“Na·a bol pangsako den·ode komibeoba bol pangbongako ge·dapskabo. An·ching bolrangko ge·engon, uarangko ge·mangmangaigija, ua bolrang an·tangtangari dal·roroe an·chingna dongtoaniko aro chirangko on·na man·na gita an·ching an·chingni ge·gipa bolrangko komibeoba bilsibonganade simsak nirokna nanga,” ine Sangma aganaha.

Ia salko manianio, Social Forestry & Territorial Division Baghmara-ni District Forest Officer MM Sangma-ba dongpae jinmana aganprakangengon, a·sal gri ong·gimin a·arangko tangatpilna nangchongmotani gimin agan-talatanirangko on·angaha.

Da·ororo manderang chiring chibisik donggipa biaprangoba a·barangko o·e cha·engani gimin an·tangni suk ong·gijaniko parakatengon, o·gimin a·barango bol wa·arangni pal guerangko ge·skaengahani a·sel a·arang ran·roroangengaha aro chirangko man·na neng·ani ong·engaha ine iandake chibisik donggipa biaprango a·barangko o·e cha·jachina gita DFO, songni nokni manderangko didiangaha.

Ia tom·anio dongpae jinmana aganprakanggipa gipin manderangara, Social Forestry-ni RFO Dr AD Marak, RFO CM Marak aro gipinrang ong·a.

Baghmara-o ia salko maniani bak gita noksa salsusaani, essay sesusaani, bol chara sualani aro bol ge·anirangkoba ong·atangaha.

Apsan daken, East Garo Hills a·jaoba ia World Environment Day-ko Soil & Water Conservation Department-ni gita Akelgre songo donggipa Balchol A·brini Manda Nokpante-o manidilangaha aro ia salko manianio, a·dokni Soil & Water Conservation Minister Marcuise N Marak, mongsonggipa sokgipa ong·e bak ra·angaha.

Ia tom·anio a·dokni Soil & Water Conservation Minister Marcuise N Marak, jinmana aganprakangengon, samtangtango ong·telaigiparangko tangatpilanio dingtang dingtang kamrangna a·dok sorkari, gong crore 340-ko chamataha ine parakatenba, dingtang dingtang songrangni gisepo bol ge·susaanirangko ong·atanichi bol wa·arangko tangatpilchina didiangaha.

Ia tom·anio, East Garo Hills a·jani Deputy Commissioner Vibhor Aggarwal-ba dongpae, jinmana aganprakangengon, iandakgipa program-rangko ong·atanichi samtangtang ong·telaigiparangko tangatpilna kam ka·enani gimin Soil & Water Conservation Simsanggre Division-ko mittelpilangenba, samtangtango ong·telaigiparangko ripinganio gipin department-rang baksa nangrime songni nokni manderangna mikrakatanirangko on·china department-ni official-rangko didiangaha.

Ia World Environment Day-ko maniani bak gita jinma, Manda Nokpante-ni wilwilao bolrangko ge·angaha.

Ia World Environment Day-ko West Garo Hills a·jani Selsella, Dadenggre, Rongram, Gambegre aro gipin block-rangoba maniangtokaha aro ia salko manianio block-tangtangni Block Development Officer (BDO)-rang, block-o kam ka·giparang, village organization-ni membor-rang, cluster level foundation-ni membor-rang aro gipinrangba bak ra·angtokaha.

Ia salko maniani bak gita pilak block-rangon bolrangkoba ge·angtokaha.

CAU-I, ATARI-Zone VII-ni ning·o donggipa Krishi Vigyan Kendra (KVK) South Garo Hills a·jani gitaba ia World Environment Day-ko Budbar salo maniangaha aro ia salko manianio KVK SGH-ni official-rang, skulni bi·sarang, songni chadamberang, aro songni manderang baksa bite nanggipa dingtang dingtang bolrang, jekai Letchu, Komperam, Apple, Dalim, Draka aro iandakgipa gipin bolrangkoba ge·angaha.

Tura-o donggipa Community Science College-ni gitaba ia World Environment Day-ko maniangaha aro ia salko maniani bak gita Sangsanggre Secondary School-o poraienggipa bi·sarangna poster painting competition-ko ong·atangaha.

Ia program-ko Community Science College-ni Multi Technology Testing Centre aro Vocational Training Centre-o ong·atangaha aro ia program-ko ong·atanio, Community Science College-ni Dean Dr Jyoti V Vastrad, MTTC VTC-ni Assistant Professor Dr HG Kencharaddi, aro gipin skigiparangba bak ra·angtokaha.

Apsan daken, Garo Hills-ni Akhil Bharatiya Vidyarthi Parishad (ABVP) dolni gitaba ia World Environment Day-ko Garo Hills gimikon maniangaha aro ia salko maniani bak gita dingtang dingtang office-rangna, skulrangna aro college-rangna bol chararangko suale on·angan baksana bolrangkoba ge·angtokaha.

Indake ong·engon, 120 Battalion Central Reserve Police Force (CRPF) dolni gitaba ia World Environment Day-ko Tura-ni Industrial Area-o maniangaha aro 120 Bn-ni Commandant Pramod Kumar Singh-ni dilanichi bolrangko ge·angaha.

Ia salni bako 120 Bn CRPF-ni sipairang pang 2000 bol chararangko ge·angaha aro dingtang dingtang bolrang, jekai Ashok, Jamun, Kahtal, Te·gatchu, Amrud, Gulmohar, Balsam, Tejpatta, Dalchini, Agar, Paikas aro uandakgipa bolrangko Tura-ni Industrial Area-o ge·angtokaha.

spot_img
spot_img

Related articles

MeECL studying HC judgment on ‘equal pay for equal work’

Shillong, July 21: The Meghalaya Energy Corporation Limited (MeECL) is examining the recent judgment by the single bench...

10 NE councils to ask Centre to table Sixth Schedule Amendment Bill in Parliament

SHILLONG, July 21: The ten autonomous council (ACs) and territorial councils (TCs) of the Northeastern states have unanimously...

KSU vows to continue drive against labourers

SHILLONG, July 21: The Khasi Students’ Union (KSU) on Sunday said while the state government examines various mechanisms...

TMC undecided on contesting Gambegre bypoll

SHILLONG, July 21: The Trinamool Congress has gone quiet about the Gambegre by-polls with the state unit yet...