TURA: Sombar salo, NRLM project-ni ning·o Dadenggre Block-ni Asimgre aro Wanma Village Organisation (VO) Modelgittimrangna fishery pond ba na·tok jilani pokkri aro Bolero pik-up gari bolsako pakwate on·na gita Dadenggre Block-ni MSRLS, program-ko ong·atangaha.
Ia song damgnini VO-rangna, dingtangmancha janggi tangani cholrangko on·na aro Self Help Group (SHG)-rangni kamrangko tang·doatna gita Community Investment Funds (CIF)-ni ning·o gong lak 5-prak-ni project-rangko on·angaha.
Ia fishery pond-o jilenggipa na·tokrang dal·ahaode, self help group-rang gipin a·dokrangoni na·tokrango pangchakna nangjana gita na·tokrangko SHG-rangna palskagnok aro uamang ia na·tokrangko manderangna pale an·tangtangni man·gnirangko bariatna man·gnok.
Ia fishery pond aro Bolero pik-up gariko Asimgre aro Wanma songni VO-rangna pakwate on·na gita program-ko ong·atanio, Dadenggre-ni Civil SDO Sumit Singh, mongsonggipa sokgipa ong·e bak ra·angaha aro ia program-ko ong·atanio ua jinmana aganprakangengon, an·tangtangni kamrangko gipin asol company-rang gita ong·atchina aro block gimiknan dakmesokgipa ong·china songgnini SHG-rangko didiangaha.
Ia program-ko ong·atanio dongpae bak ra·anggipa gipin manderangara, MSRLS-ni District Mission Manager Michelle Momin, Dadenggre Block-ni Junior Rural Development Officer Kasanchi Sangma, Bakdil-ni Director Fr Cyril Sangma aro Bakdil-ni Deputy Director Rakseng Marak ong·a.
