TURA: 1972 bilsini State Reservation Policy-o Khasi-Jaintiarangn 40% aro Garorangna 40%-ko chamahaoba da·alonan A·chikrang, pilakni gitan Khasi aro Jaintiarangna bate ja·manchakkuenga ine Reservation Policy-ko gital dake nipiltaina ba taridapna miksonganiko Garo Hills-ni gitchambatsranggipa regional political party Garo National Council (GNC) raken jegalataha.
“1972 bilsini State Reservation Policy-o Khasi-Jaintiarangna 40 percent, Garorangna 40 percent, a·dokni gipin jatrangna 5 percent aro General Category-na 15 percent-ko chamahaoba, songalni gita, man·e cha·batani gita aro lekka porani gitaba kamrango man·anio Khasi aro Jaintiarangan bang·bate namgnirangko man·enga aro iako darangba jegalna man·jawa,” ine GNC-ni general secretary Augustine R Marak, SRP-ni expert committee-na sedoatgipa chittio parakataha.
District Selection Committee-ni gita kamrangko ra·ani bidingo janapatskaengon, Khasi-Jaintia aro Garorangna chu·gimik 80 percent-ko chamahaoba ian lekkao semangmanganisan ong·aia indiba kakket aro bebeo ja·rikenggipade ong·ja maina Khasi aro Jaintia Hills a·jarango bang·bata kamrangkon Khasi-Jaintiarangsa man·batenga ine Marak parakataha.
GNC-ni parakatani gitade, sorkarini pilak office-rangko tosusagenchimoba, skul-college-rangko tosusagenchimoba aro porikkarango pass ka·ani percentage-rangko tosusagenchimoba pilakni gitan Khasi aro Jaintiarangan batengani gimin Reservation Policy-ko gital dake taridapani ba nipiltaianiara kraani ong·jaenga.
“Uarangsan ong·aigija rama jal·lang, sanna banani cholrang, songsal, economy aro lekka porani gita tosusagenchimoba Khasi aro Jaintiarangan cholrangko man·batgipa ong·engani gimin chinga GNC-de 1972 bilsini Reservation Policy-ko gital dake nipiltaina ba taridapna miksonganiko raken jegalenga aro a·doko songdongenggipa pilak jatrangni namgninan 1972 bilsini State Reservation Policy-kon ja·rikangkuchina didienga,” ine GNC-ni general secretary Augustine R Marak parakataha.