SHILLONG: Bilsi 10-na skang ANVC aro ANVC-B dolrang baksa ma·mong aro a·dok sorkarirangni songgrikaniko kakket ong·e chu·sokatgenchimode Meghalaya a·doko songdongenggipa mongsonggipa jatgittamni gisepo meligrikgijanirangko chel·chakna man·genchim ine Tura-ni MDC aro BJP-ni state vice president Bernard N Marak parakataha.
Marak-ni aganani gitade, ia songgigrikanirangko chu·sokatanio ja·manchakengani a·selan Reservation Policy-ni bidingo jatgittamni meligrikgijanirangko namatna man·kujaenga.
A·dok sorkarini adita department-rangko district council-rangona apjitna gita ku·rachakani baksa songgigrikanio soi ka·grikani bilsi 10 gappilengaha ine janapatengon, “Ia songgigrikaniko chu·sokatanio ja·manchakengani a·selan a·doko songdongenggipa mongsonggipa jatgittamni gisepo meligrikgijanirang ong·enga maina sorkarini ku·rachakgimin gita district council-rangko mangrakbatatgenchimode damgittam district council-rangon kamrangko ka·e cha·na cholrangko man·genchim,” ine Marak parakataha.
ANVC dolrang baksa songgigrikaniko kakket ong·e chu·sokatbebegenchimode district council damprakan jattangtangna cholrangko on·e reservation policy-ni bidingo meligrikgijanirangko chel·chakna man·genchim ineba GHADC-ni Tura MDC aganaha.
“Chu·gimik 100 percent-ko man·jagenchimoba 80 ba 85 percent-ni gitade, district council-rango kamrangko nakatate jattangtangna tikatna man·genchim aro iachin meligrikgijanirangko komiatna man·genchim,” ine ua aganaha.
Marak-ni parakatani gitade, politics-ni gita jak on·paani a·selsa reservation policy-o Garorangna 40 percent aro Khasi-Jaintiarangna 40 percent kanganiko name ja·rikjaengachim.
Political dilgiparang an·tangtangni man·gnina ia jatgittamni gisepo bak rengsi sualaniko pe·aha ineba Marak, an·tangni suk ong·gijaniko parakataha.
“Politics-ni gita maming jak on·paani dongjagenchimode jatgittamni gisepo 40-40 dake biapko sualaniara chu·ongaigenchim indiba political dilgiparang an·tangtangni man·gnina iano jak on·paahani a·selsa da·alo jatgittamni gisepo meligrikgijanirang ong·katenga,” ine ua aganaha.
