Gipin biaprangoba police outpost-rangko kuligen ine CM ku·rachaka
SHILLONG: Sukrobar salo, a·dokni Chief Minister Conrad K Sangma, West Khasi Hills a·jao Mallangkona Police Outpost-ko nokdonggae on·angaha aro ia police outpost-ko nokdonggaanio, a·dokni Deputy Chief Minister Prestone Tynsong, MLA R Momin, a·dokni DGP Idashisha Nongrang, MDC Gigur Myrthong aro police department-ni official-rangba dongpaaha.
Mallangkona police outpost-ko nokdonggae on·anganio a·dokni Chief Minister, jinmana aganprakangengon, a·dokni manderangna naljokani aro chel·chakaniko on·anian sorkari mongsonggipa daito ong·a ine parakangaha.
“Ru·uta bilsirangonin Mallangkona songni manderang, police outpost-ko songe on·china dabitokengachim aro da·alo manderangni nangnikaniko chu·sokate on·anian manderangna naljokani aro chel·chakaniko on·anian sorkarini mongsonggipa daito ong·e ine mesokani ong·aha,” ine Sangma aganaha.
A·dokni manderangna naljokaniko on·na gita gipin biaprangoba apsan daken police station aro outpost-rangko sorkari kulie on·angkugen ineba Chief Minister ku·rachakaniko on·angaha.
Assam a·dokni simao ia police outpost-ko donanichi jolni manderangna ka·donganiko on·na aro dingtang dingtang a·sel ong·anirangko chel·chakna dakchakani ong·gnok ineba Chief Minister parakataha.
“Sima jolrango meligrikgijanirangko namatna gita a·dok sorkari, Assam sorkari baksa kamrangko ka·enga aro da·o chinga damdok biaprango meligrikgijanirangkoba namatna kam ka·engaha,” ine ua aganaha.
Sima jolrango songdongenggipa manderangni neng·nikanirangko sorkari ma·sienga ine janapatengon, manderangni neng·nikanirangko chel·atna aro sima jolrango songdongenggipa manderangni janggi tanganiko namdapatna gita sorkari rake kamrangko ka·enga ine Chief Minister aganaha.
Ia Mallangkona Police Outpost-ko PIRF fund-ni tangka paisarangchi rikaha ine talataniko on·angengon, ia PIRF Fund-ko da·ode a·jatangtangni Superintendent of Police (SP)-rangna pakwatmanahani gimin a·dok sorkari ra·chakna nanggija an·tangtangan gital nokrangko rikna man·aignok ine Sangma parakataha.
Ia Police outpost-ko rikanio an·tangtangan kamrangko ka·ahani gimin aro nok rikani bosturangkoba on·ahani gimin ua dingtangmancha Mallangkona jolni manderangkoba mittelpilangaha.
Mallangkona Police Outpost-ko 2019 bilsio songahachim aro ia outpost-na Police Infrastructure Renovation Fund (PIRF) scheme-ni ning·o gong lak 17.5 tangkarangchi gital nokko rikahachim.