SHILLONG: State Reservation Policy (SRP)-ni bidingo meligrikjaengani a·selsa Lok Sabha election-o a·dokni damgni constituency-on National People’s Party (NPP) amako man·aha ine NPP-ni gitcham state president aro Rajya Sabha-ni MP WR Kharlukhi a·kangataha.
Kharlukhi-ni aganani gitade, Reservation Policy-ko Khasi-Jaintiarangara gital dake nipilaniko aro Garorangara nipiltaijachina nangnike meligrikjaengani a·selsa Lok Sabha election-o a·dokni seat damgnion NPP amako man·aha.
“Garorangara, chief minister-ko Khasi-Jaintiarangnasa mikkang niteenga ine chanchia. Election-o chinga amako man·ade ong·aia indiba a·dokko dilgipa ong·e a·doko songdongenggipa manderangni gisepo meli-nangrimaniko rakkiani giminsa chanchibatna nanga,” ine Kharlukhi aganaha.
Reservation policy-ko gital dake nipiltaina chief minister-ni ra·chakahani gimin janapatengon, “Angni miksonganide namgipa politics-ni election-ko chegenchim ong·ode nambata indiba okumu chake jingjengataiani gimin aro reservation policy-ko nipiltaichina dabiahani giminsa VPP cheaha ong·ode ian namjabegipa chin ong·a,” ine Rajya Sabha MP aganaha.
Politics-de pangnan dingtang ong·aia ine janapatengon, “An·chingni chief minister, joljol election-o cheaha indiba basakoba an·ching election-o amako man·aia. Dr Mukul Sangma-ba bilsichetna CM ong·aha indiba ua ja·mano amako man·aiaha. Ian politics-ni bak ong·a,” ine ua aganaha.
Kharlukhi-ni aganani gitade, BJP bakrimaniko on·ahani giminde ia election-o NPP amako man·jaha maina 2016 bilsioba BJP chakpaaniko on·an baksana gitcham Tribal Affairs Minister-ba NPP-na campaign ka·aha aro ua somoio da·o CM ong·enggipa bang·bea vote-rangchi Garo Hills-o chegipa ong·ahachim.
Garo Hills-o VPP chegipa ong·genchimosa a·doko pilak political dolrangkon chena man·gen ineba ua aganaha.
“Khasi-Jaintia Hills-mangmangde Meghalaya ong·ja maina Garo Hills-ba Meghalaya-ni bakan ong·a. Sorkariko rikna chanchienga ong·ode uamang (VPP) Garo Hills-ona re·angchengchina aro Garo Hills-o uamang chegipa ong·genchimosa a·doko chu·sokbatgipa political dol ine aganna man·gen,” ine Kharlukhi parakataha.