Party worker-rangko matnange aganskaa
SHILLONG: Adita salrangna skang ong·atanggipa Lok Sabha election-o BJP-ni dakchake on·gipa National People’s Party (NPP), chu·sokna man·jahani gimin Meghalaya a·doko BJP-na kam ka·enggipa bang·a manderangan suk ong·nikgijaniko paraktokahaoba, BJP-ni dilgipa aro Meghalaya a·dokni in-charge M Chuba Ao, an·tangni kosako matnanganirangko jegalskaaha.
BJP-ni kamrang chu·sokgipa ong·jahani gimin kam ka·enggipa manderangni matnangenggipani bidingo sing·anina aganchakaniko on·angengon, ian badiaba worker-rangni chanchianisan ong·aia aro gimikande uni kosako chakatenga ong·ja ine Ao parakataha.
“A·songni pilak biaprangon chinga baditaba dam seat-rangkode gimaatna nangahani gimin ian a·song gimikon ong·enggipa obostasa ong·aia. Ia chango balwarang dingtangahani gimin chinga state in-charge-rangkode matnangna man·jawa,” ine ua aganaha.
Tura parliamentary seat-oni susana gita BJP-ni candidate-ko susaatjahanina Garo Hills-ni mitam dilgiparang, ma·mongo BJP-ni dilgiparango kusi ong·gijaniko paraktokahani gimin Ao, ia kattarangko aganaha.
Meghalaya a·dok gita dakgipa Kristian a·doko Kristian in-charge dongpileba maini a·sel BJP chu·sokna gita man·chipjaenga ine sing·anina aganchakaniko on·angskaengon, ia chang BJP-na kam ka·giparang mitamrangsan gisiko nange kamko ka·aiaha indiba bang·batan kam ka·na gita re·batokjaha ine Ao aganaha.
“Da·alo party worker-rang ching baksa ong·enga knalde haida uamang gipinosa ong·skanaba donga. Chinga uamangode chu·gimik ka·dongna gita man·ja. Je worker-rangan gisiko nange kamko ka·enga, uamangde namen kamrangko chu·sokatna man·enga,” ine ua aganaha.
Tura parliamentary seat-o amako man·ahanina an·tangni kosako matnanganirangko jegalatengon, ian uni a·selsa ong·bebegenchimode maini gimin Assembly election-rango BJP-ni candidate-rang Garo Hills-ni seat damsakoba chena man·jaha ine Ao sing·doatskaaha.
“Uamang kamrangkode name nisujawa indiba gipinkosa matnangna man·rongaia. Ian party worker-rangni kamko mesokani ong·a,” ine ua aganaha.