A·doko rama-sorokni project-rangko den·galna MoRTH mikrakata

SHILLONG: Mongsonggipa rama-sorokni project-rangna land acquisition ba a·a nangdape man·enggipa neng·nikanirangko namatna Meghalaya sorkarini man·gijani a·selo Ministry of Road Transport aro Highways (MoRTH)-chi raken matnanganiko man·aha aro ua a·a nangdapgipako on·a man·jaode a·dokna chamatgipa rama-sorokni project-rangko den·galna mikrakataniko man·aha.
Chief Minister Conrad K Sangma, ru·utgija salo New Delhi-o Union Minister-ko grongaha ia obostako janape aganao uamangni chanchiani gita ong·gijagipa a·a nangdapgipa neng·nikani bidingo Ministry chanchiaha, ine aganaha.
Shillong Western Bypass-na 100 per cent chu·gimik a·a nangdapgipana  a·dok sorkari sima salengaha. Nangdapgipa a·anirangni bidingo adita km-kosan ministry mesokdapaha, chief minister aganaha.
90 per cent neng·nikenggipako matchotataha bangki dongenggipa neng·nikaniko jagnio matchotatgen ingipa sorkarini talatgipa buringrangni bidingo ministry janapaha, chief minister aganaha.
A·a nangdapgipako ru·utanio aro uko ru·uta salrangna ru·utatenggipa ua a·jolrangni bypass-ni bidingo ministry raken aganaha.
Rama-sorok project-rangni kamrango jak on·pachina daitoko jako ra·e kamko ka·giparangko didie Umiam-oni Silchar-ona kingking four-lane ramako namen man·a ske de·e mesokgipani bidingo chanchienganiko chief minister parakaha. Mongsonggipa bakrango de·e mesokgipa namen ta·rakna nanggipa biapko jekon donchipenga uko survey ka·na a·bachengenga, ua aganaha.
A·a nanggipani bidingo Meghalaya sorkarioniko dakchakaniko man·jaode a·dokna chamatgipa rama-sorokni project-rangko bon·atna a·bachengaon National Highway Infrastructure Development Corporation Ltd (NHIDCL) mikrakataha.
A·dok sorkario meligrikgijanirang dongani a·selo Meghalaya-o uamangni project-rangko kam ka·na namen neng·a, NHIDCL official-rang aganaha.
Shillong Western Bypass-na a·a nokgiparangna sorkari tangka on·a man·jaha aroba corporation adita jarangna skangon a·a nanggipa gimikna tangka-paisarangko sorkarina chipatataha, official-rang aganaha.