Duko ga·akenggipa manderangna dakchakanirangko on·china AMMSU didia
TURA: Batanggimin antirangonin mikkarang dontonggija waanganichi Garo Hills-ni mongsonggipa chibimarang ditdobae, a·kawe jolrango chirang bane manderang neng·nikanirangko chagrongna nangtokengaha.
Kobor on·ani gitade, batanggimin salrangonin mikkarang dontonggija waangahanichi, Jinjiram aro Brahmaputra chibimarang dal·baaha aro ia chibimarangoni chi ditdobaenba, Tikrikilla, Chibinang, Phulbari, Rajabala, Hallidayganj, Mahendraganj aro uandakgipa dingtang dingtang biaprangko chirang banna a·bachengaha.
“Ia jolrango bang·bata songrangon chirang banengahani gimin manderangna kenna nanganirang ong·engaha. Mikkangchiba mikkarang dontonggija waangkugenchimode ia jolrango obostarang namjabatangnaba gnang. Da·o ia songrango ja·skuona chi sokengaha aro bakan gitokona sokaignok,” ine All Meghalaya Minority Students Union (AAMSU)-ni president Nur Islam parakataha.
Ia jolrango chirang bananichi manderang neng·nikanirangko chagrongna nangtokengani gimin dakchakanirangko ta·raken on·china gita uamang a·dokni Chief Ministe Conrad K Sangma-na sedoataha ineba AMMSU-ni president parakataha.
Iani bidingo West Garo Hills a·jani Deputy Commissioner Jagdish Chelani-o sing·sandiatskaon, obostarangko official-rang salantian nirikkienga aro dakchakanirangko on·na tarie dongenga ine parakataha.
“Da·o dipet song damsaona agrede obostarang namsrangjade ong·kujaenga indiba chinga pangnan obostarangko nirokenga. Bang·bata biaprangon chirangni chonangengako chinga nikna man·enga. Indiba mikkarang waangkua ong·ode obostarang namjabatnaba gnang. Ganol chibimaba da·o nangana bate dal·engahani indiba da·o dipet maming badi ka·anirangko man·soa dongkuja,” ine West Garo Hills a·jani Deputy Commissioner parakataha.
Banoba maiba a·selrang ong·na nanggenchimode dakchakanirangko on·na gita Disaster Management dolni chu·gimik manderangan tarie dongtokenga ineba Chelani parakataha.
Tura songjinmaoba batanggimin salrango mikkarang dontonggija waangahaoba Budbar salode adita sal rakbaskaaha aro ian manderangna rang·speaniko on·angani gita ong·aha.
Batanggimin salrango Tura songjinmani dingtang dingtang biaprangoba a·a be·anirangko bang·en nikna gita man·ahachim.