TURA: Adita salrangna skang, West Garo Hills a·jani Teksragre songo me·chik saksako dokaniara A·chikrangni niamo pangchake, uni ong·gija dakgipa kamrangna mama-adarangni doke skianisa ong·a ine Garo Hills-ni dolbonga NGO-rang, chong·motan FKJGP, ADE, AYWO, GSU aro FAF dolrang parakatenba, ia a·sel ong·anio police-rangni rim·gipa manderangko watpilchina dabiangtokaha.
Iani bidingo dolbonga NGO-rang, Garo Hills Autonomous District Council (GHADC)-ni chief executive membor (CEM)-na sedoatenba, jatni niamrango champengjana gita sorkari aro district administration-na u·iatchina didiataha.
West Garo Hills a·jani Dadenggre jolo donggipa Lower Teksragre songo, me·chik saksako baditaba sak me·asarangni ka·saninggija dake dokako social media-rango niksona man·ani ja·man police-rang, sakdok manderangko rim·ahachim ine nikna man·a.
Indake ong·engon, ia a·selni bidingo uamang am·sandianirangko dakenba, ian jatni niamo pangchake, ong·gija kamko ka·ahani giminsa me·chikko uni mama-adarang doke sate skiahachim ine Nokmaoniko ma·sina man·aha ine dolbonga NGO-rang parakataha.
“Chingna Nokmani talatani gitade, ia me·chik ong·gija kamko ka·engachim aro ia me·chikni bidingo brigipa changna badi ka·aniko man·soahani giminsa me·chikni mama adarang, uko doke sate skie on·engachim. Ia me·chik, bia ka·gimin gipin me·asa baksa ‘denggu’ dakaha ine ku·rachaka aro A·chikrangni niam gitade, iandakgipa kamko ka·on pangnan daiko gamna nanga. Ia me·chik changni chang ong·gija kamko ka·ahani giminsa uni mama-adarang, an·tangni nokdangna aro ma·drangna kratcha·ataniko ra·baahani gimin jatni niamo pangchake doke skina nangao ga·akaha,” ine dolbonga NGO-rang parakataha.
A·chikrangni niam retio pangchake nodrang ba namchikgiparang, ong·gija kamrangko ka·ode pangnan uni mama adarang uko doke sason ka·na aro skie ra·na gita bilrang donga ineba NGO-rang talataniko on·angaha.
“A·chik nokdangrango da·alona kingkingba mama adarang, nogipa jonggiparangko, namchiktangko ba gritangrangko doke skina bilrangko jakkalengkua aro ia kamko Garo Hills Autonomous District Council (GHADC)-mangmangba champengna man·jawa,” ine dolbonga NGO-rang parakataha.
A·chikrangni daka rikani kamrango jak on·paahani gimin district administration-ni kamko jegalatengon, rim·a man·gipa manderangko ta·raken watpilchina aro A·chikrangni niamko pe·e mama-adarangni mikkimko nitogija ong·atahanina tangka paisarangko gamskachina NGO-rang dabiangaha.
Me·chikko dokanina rim·a man·gipa-rangko watpilchina NGO-rang dabia
Date:
Share post: