Sunday, July 6, 2025
spot_img

Tura-ni skanggipa Bishop-ko mande ra·bee gopa

Date:

Share post:

spot_imgspot_img

TURA: Sukrobar pringwalo a·gilsakko watanggipa Tura-ni skanggipa Bishop Emeritus George Mamalaserry-na Sombar salo, Garo Hills-ni manderang, bon·kame mande ra·pilskaaniko dakenba, RC Road-o donggipa Cathedral Mary Help of Christians Church gopramo gope galaha.

Bishop Mamalaserry-ni manggisiko gopna skang, Tura-ni Sacred Heart gilja noko dingtangmancha jinma olakkianiko ong·atangaha aro ia giljako Northeast Bishops Council-ni Chairman Most Rev John Moolachira, Tura-ni Bishop Andrew R Marak aro Tura-ni Auxiliary Bishop CJ Jose dilangaha.

Tura Diocese-ni skanggipa Bishop Mamalaserry, 1979 bilsioni 2007 bilsiona Garo Hills-ni manderangna dangdike on·angaha aro kamoni neng·takani ja·manba ua songtangona re·angpilgija an·tangni siaona kingkingan Garo Hills-na dangdike on·angkuaha.

Bilsi 92 ong·gipa Bishop Mamalaserry-ko ia bilsini April jao, rang·sitanio neng·nikanirangko man·ahani gimin Holy Cross Hospital-ni Intensive Care Unit (ICU)-o done sannaniko on·engachim indiba saaoni nampilna gita man·jae ua Sukrobar pringo a·gilsakko watangahachim.

Bishop Mamalaserry, jekon Varkey ineba mingachim, 1932 bilsini April 23 tariko, Kerala a·dokni Kalathoor-o Kurian aro Elizabeth Mamalaserry-ni gittamgipa aro chonbatgipa depante ong·e atchiahachim.

Ua bilsi 4 ong·mitingonin songni skulo poraiaha aro 1950 bilsio poraia matchotenba noktangko wate, Madras-ona re·baenba Madras-Mylapore Diocese-ni ning·o donggipa Poonamallee-ni Sacred Heart Seminary-o poraieaha. Poonamallee-o poraiengmitingo ua salgro salaramni gitcham Shillong-Guwahati Archdiocese-o kamko ka·na baseaha.

Bishop Mamalaserry-ko 1960 bilsini April 24 tariko Madras-Mylapore-ni Archbishop Most Rev Louis Mathias DD, pamong songaha.

Pamong songako man·ani ja·man uko Shillong-Guwahati Archdiocese-o missionary ong·e kamko ka·na watataha aro Shillong-ona sokbaon uko Garo Hills-ona Isolni jokataniko gipatna gita watataha.

Tura-ona ua 1960 bilsini August 14 tariko sokbaon uko Fr Anthony Buccieri SDB-ni dakchakgipa pamong ong·na gita seokenba dingtang dingtang songrangona re·e kamko ka·na gita watataha.

1965 bilsio Bishop Mamalaserry-ko Fr Matthew Elanjipuram-ni dakchakgipa pamong ong·e Baghmara-ona watatskaaha aro uanoni ua 1970 bilsio Dalu-ona apjitatako man·skaaha.

1971 bilsini Bangladesh War-o Bishop Mamalaserry, Parish-o katnapgipa East Pakistan-ni manderangko simsak nirokanio mongsonggipa kamko ka·aha.

1979 bilsini February 8 tariko Fr George Mamalaserry-ko Tura-ni skanggipa Bishop dake Pope John Paul II songe on·aha aro 1979 bilsini March 18 tariko uko salgro salaram gimikni Bishop-rang aro hajal kotok manderangni mikkango Bishop-na to nongaha.

Tura-ni Bishop ong·engmiting somoio Rev Mamalaserry, Garo Hills-o songdongenggipa manderangni namgnina kamrangko ka·aha.

Ua somoio Garo Hills-o lekka pora aro an·seng baljokani kamrango namen ja·manchakkuenga ine nikenba Bishop Mamalaserry, Garo Hills-ni damgittam a·jarango dam 24 Parish Centre-rangko kulidape on·aha aro ia pilak Parish centre-rangon ua skulrangko, dispensary-rangko aro chatro chatrirangna hostel-rangkoba kulie on·aha. Garo Hills gimiko uni kulie on·anggipa dam 57 LP skul, dam 35 ME skul, dam 16 secondary skul, dam 2 higher secondary skul, dam 24 me·chikrangni hostel, aro dam 23 me·asarangni hostel-rang donga.

Bishop Mamalaserry-na bon·kame mande ra·pilskaaniko dakatanio, a·dokni Chief Minister Conrad K Sangma, a·dokni gitcham Chief Minister Dr Mukul M Sangma aro dingtang dingtang dilgiparangba dongpae bak ra·angtokaha.

spot_imgspot_img

Related articles

After Paul, now Rymbui bats for MRSSA over ILP

By Our Reporter SHILLONG, July 5: While pressure groups are raising a renewed pitch for ILP in Meghalaya, the...

In this image via PMO, Prime Minister Narendra Modi pays homage at the San Martin Memorial, in Buenos Aires, Argentina, on Saturday

In this image via PMO, Prime Minister Narendra Modi pays homage at the San Martin Memorial, in Buenos...

Police use water cannon to disperse Congress workers during a protest demanding the resignation of Kerala Health Minister Veena George over the death of...

Police use water cannon to disperse Congress workers during a protest demanding the resignation of Kerala Health Minister...

Resistance from landowners, locals delays border fencing work in state

By Our Reporter SHILLONG, July 5: The border fencing working in Meghalaya is progressing at snail’s pace despite concerted...