TURA: A·dokona sruksruk napdrabaenggiparangko champengsona gita MRSSA-ko Sorkarini ra·gatna ja·manchakengani gimin Garo Hills TMC, Chief Minister Conrad Sangma-ko matnangaha aro Labour Department-san iandakgipa labour-rangni lekkarangko check ka·na ba sandini bil on·ako man·gipa ong·aia ine aganaha.
MRSSA-ko ra·gatna ja·manchakengani gimin Sorkarini kosako sing·doengon, Labour Department namedake kam ka·genchimode, a·palchini manderang maikae a·dokon re·bae kamrangko ka·e cha·na man·enga, party sing·doaha.
“MRSSA 2016-o segatgimin giatde, a·dokni a·paloni jemangan kamrangko ka·e cha·na gita Meghalayaona re·baachim, uamang an·tangtangni bimingrangko District Task Force-o ba aino gita dongimin facilitation center-rango segatna nangachim. Indake uamangni bimingrangko segaton, uamang banoni aro chong·mot ong·anirangko chu·gimikkon segatgenchim. Bimingrangko segatani aro uamangni chong·mot ong·aniko sakki on·ani ja·mano, Meghalayao kamrangko ka·e cha·na gita work permit ba registration certificate-ko man·genchim. Meghalaya-ni a·paloniko rimbae kam ka·atenggipa nokgiparangba, uamangni rimbagipa manderangni bimingrangko segatna nanggenchim. Iako dakani miksonganian, a·dokna re·bae kam ka·e cha·giparangni aro a·doktangni manderangni naljokgninasa ong·achim” ine TMC-ni Youth dilgipa Richard Marak aganaha aro a·dok sorkari maina indakgipa District task forces-rangko ba rehabilitation centre-rangko songanio ja·man chakenga ineba sing·doaha.
Marak-ni aganani gitade, Khasi Students’ Union (KSU)-ni Inner Line Permit (ILP) check gate-rangko an·tangtangan songaniara, A·dok Sorkari kam ka·teljani giminsa, jajrengsomanchae kam ka·ani ong·enga. A·doko biming mamingkoba segata gri aro nanggipa lekkarang gri kam ka·enggipa sak 500-rangko rim·a man·aniara aro uamangko watpilatna nangenggipa kamara, namen simsaksona nangenggipa kam ong·a aro aro ian a·dok sorkarini simsaksojaengani gimin ong·a, Marak aganaha.
Unomitingo, Meghalaya Residents Safety and Security Act (MRSSA)-ko ra·gatna gita adita taridapna nanggiparangko taridape ine Chief Minister Conrad Sangma-ni redilgipa sorkarini manderangko dilsretenganinaba ua matnangaha. Ia MRSSA-rangko skang Dr Mukul Sangma-ni dilanion tariman·jokchima, aro aro pilak agangrikna nanganirangkoba agangrikmanjokchim ineba ua aganaha.
“Meghalaya Residents Safety and Security Act 2016-kora taridapna nangbebeengama? Taridapna nangchongmotenga ong·ode, uarang state legislature-ni bilon ong·achim, indiba taridapna nangenga ine bon·ate dongaiode namen kratcha·anisa. Iako ra·gatnara sorkariora maia neng·nikani dongengachim?” TMC youth dilgipa sing·aha.
Ia Meghalaya Residents Safety and Security Act-ko Sorkari gisiko nangemanchan ta·rake ra·gatna kam ka·na anga ineba Marak, didianiko on·aha.
