SHILLONG: Meghalaya a·doko Inner Line Permit (ILP) aro Meghalaya Residents Safety & Security (MRSSA) Amendment Bill 2020-ko ra·gate on·chipjaengani gimin a·dokni dingtang dingtang dolrang, niamko jaktango ra·e gipin biaprangoni re·bae kam ka·e cha·enggipa manderangko am·sanditokengon, a·doko ra·gatgimin niamrangko jakkalenba, a·dokona gipin biaprangoni napsrukbaenggipa manderangko bilakbate nirok sandichina United Democratic Party (UDP)-ba a·dok sorkariko didiataha.
Gipin biaprangoni re·bae kam ka·e cha·enggipa manderangoniko KSU aro gipin dolrangni nanga lekkarangko am·sandiengani gimin janapatengon, iandake gipin biaprangoni re·bae kamrangko ka·e cha·anirang batroroenganiara a·dokna aro a·doko songdongenggipa Tribal manderangna kenchakna nangani ong·enga ine UDP-ni president Metbah Lyngdoh parakataha.
A·dokona re·bae kam ka·e cha·enggipa manderangko nirok sandina, kam ka·giparangko rimbae kam ka·atenggipa company aro contractor-rangna a·doko ra·gatgimin niamrang donga aro ia niamrangko name jakkalna nangenga ineba ua aganaha.
A·doktangni hajira ka·e cha·enggipa manderangna dingtang dingtang kamrangko on·chengna nanga ine janapatengon, mitam kamrangnade gipin biaprangoni kam changgipa manderangkoba nanga ine UDP president ku·rachakaha.
Gipin biaprangoni re·bae kam ka·e cha·enggipa manderangoniko dingtang dingtang dolrang, lekkarangko am·sandiengani gimin sak 2500-na baten kam ka·e cha·enggipa manderang, Meghalaya a·dokoni re·ongkatangtokahachim aro iani a·selan ma·mong sorkarini sanction ka·gipa dingtang dingtang project-rang da·o ja·donggaatako man·na nangskaengahachim.
Ia project-rangko jako ra·e ka·enggipa mitam contractor-rangni aganani gitade, a·dokona re·bae kam ka·e cha·enggipa manderangoni 90 percent-ni gitade, songtang noktangtangona katangpiltokahachim.
Meghalaya a·doko Inner Line Permit aro Meghalata Residents Safety & Security Act-ko sorkari ra·gate on·na man·jaengani gimin gipin biaprangoni re·bae kam ka·e cha·enggipa manderangko nirok sandina nangenga ine NGO-rang a·kangskaengachim.