TURA: Garo Hills-ni Sonja Wildlife Centre-o donenggipa hurorangko dingtang dingtang biaprangona apjitangna manchianiko aro Garo Hills-o nikna man·gipa guangrangko mingsrena manchianiko jegalan baksana Garo Hills-ni dingtang dingtang biaprango mongmarangchi chadrapaniranchi manderang sina gita nangrongengani gimin chel·chakaniko on·na gita ja·kurangko de·chakatchina didie, Garo Hills-ni dingtang dingtang dolrang, A·chik NGOs Forum-ni bimingo a·dokni Chief Minister Conrad K Sangma-na sedoataha.
Sonja Wildlife Rescue Centre-o donenggipa hurorangko gipin biaprangona apjitangna manchienganiko jegalatengon, ia hurorangko gipin biaprangona apjitangna manchianiko ra·pilchina gita A·chik NGO-rang, Chief Minister-ko didiataha.
Ia centre-o donenggipa hurorangko Ri Bhoi a·jani Umtrew songo gital kulienggipa state zoo baksana Guwahati aro Lucknow zoo-rangona Forest & Environment department, apjitangna miksongenga ine kobor man·soani ja·man ia hurorangko gipin biaprangona apjitangjachina gita A·chik NGO-rang, a·dokni Chief Minister-ko didiataha.
“Ia matburingrangara Garo Hills-ni mikkim aro chengonin A·chikrangni mande ra·e ripingbagipa matburing ong·a aro ia matburingrangko Garo Hills-oniko gipin biaprangona ra·jitanggenchimode ian matburingrangna kenna nangani ong·naba gnang,” ine A·chik NGO-rang, Chief Minister-na sedoatgipa chittio parakataha.
Sonja Wildlife Rescue Centre-ni hurorango gipin biaprangona ra·angani pal, biaptangon nambate ripinge rakkina gitasa cholrangko ra·gatchinaba NGO-rang, a·dokni Chief Minister-ko didiataha.
“Garo Hills-o donggipa hurorangara namen dingtangmanchagipa ong·a aro ia hurorangara Garo Hills-ni dikbegipa buringrango donggiparangsa ong·ani gimin ia hurorangko zoo-rangona ra·anggenchimode uamangni dakbewalrangba dingtangnaba gnang,” ine A·chik NGOs Forum parakataha.
A·chik NGO-rangni parakatani gitade, International Union for Conservation of Nature (IUCN)-ni dongimin niamrangon gimaangenggipa matburingrangko uamangni dongchakram biaprangon donchina u·iatmanahani gimin saliramni hurorangko Guwahati Zoo aro Lucknow Zoo-ni hurorang baksa te·srena manchianiara niamko pe·ani gitaba ong·engachim.
Garo Hills-o A·chikrangni ‘Guang Sarang’ ine minggipa guangko ‘Steriphopus Wangala’ aro ‘Guang Gotek’ ba ‘Guang Nenggra’ ba ‘Guang A·nengra’ ba ‘Guang Ronggol’ minggipa guangko ‘Habrocestum Togansangmai’ ine mingsrena Scientist-rangni miksonganikoba A·chik NGO’s Forum raken jegalataha.
Ia guangrangko Gautam Kadam minggipa Wildlife Biologist, Betasing Block-ni ning·o donggipa Baladinggre songoniko aro South Garo Hills a·jani Imilchang Dare-oniko nikaha ine janapatengon, iandakgipa guangrangko ia songrangosan ong·aigija Garo Hills-ni bang·bata biaprangon nikna man·aia ine A·chik NGO-rang parakataha.
“Ia guangrangna chinga A·chik jatni gita bimingrang donga aro A·chikrang baksa agangrikchenggija ia guangrangko jatni matgrik aro jatni maniani bimingchi mingsrena tik ka·aniko chinga raken jegala. Togan Nengminja Sangma-de A·chikrangni matgriksa ong·a aro Wangalade A·chikrangni dal·batsranggipa manianisa ong·ani gimin guangrangko A·chikrangni matgrik aro manianichi biming minganiko chinga ra·chakna man·jawa,” ine A·chik NGOs Forum parakatenba, ia guangrangko iandake jatni matgrik aro maniani bimingchi mingjachina nangchakegipa official-rang aro department baksa agangrikchina Chief Minister-ko mol·molataha.
Garo Hills-o mongmarangni manderangko chadrapanirang batroroengani gimin janapatskaengon, India aro Bangladesh a·songni sima jolo donggipa Purakhasia-oni Baghmara-ona nanga gita chel·chakanirangko on·china A·chik NGO-rang, Chief Minister-ko mol·molataha.