SHILLONG: Opposition dolrang, chong·motan Congress, Trinamool Congress (TMC) aro Voice of the People’s Party (VPP) dolrangoni da·o dipet darangba, Leader of Opposition (LO) ba Opposition dolni dilgipa aro Opposition dolni Chief Whip-ko dingtangatchina dabianirang dongkuja ine Meghalaya Legislative Assembly-ni Speaker Thomas A Sangma parakataha.
“Iani bidingo chanchina gita anga tom·anikode ong·atna man·aigen indiba uamang (Opposition dolrang) gisik nangjaenga ong·ode tom·aniko ong·atna nangani katta dongja. Da·o dipet opposition dolrangoni darangba angona re·bae iani bidingo dabia dongkuja,” ine Sangma aganaha.
Indakani kride Assembly-o maming dingtanganirang dongkujawama ine sing·anina aganchakaniko on·angskaengon, opposition dolrangoni gital LO-na aro Opposition Chief Whip-na dabianirang dongjagenchimode iandaken ong·angkuaigen ine Speaker parakataha.
Opposition dolni dilgipa aro Chief Whip-ko seokani bidingo chanchirimna gita ua dingtang dingtang political dolrang aro seoka man·gipa MLA-rang baksa tom·aniko ong·atgen ine adita salrangna skangsan Sangma parakatahachim.
Da·o dipet Opposition dilgipani kamko Congress MLA Ronnie V Lyngdoh jako ra·kuengachim ine nikna man·a.
Saleng Sangma-ni Lok Sabha election-o seokako man·e MLA ong·aniko watangani ja·man Congress dolni MLA-rang sakbriona komiangahachim. Da·o dipet TMC-o MLA sakbonga aro VPP-o MLA sakbri dongskaengachim.