SHILLONG: Meghalaya a·dokona re·bae kam ka·e cha·enggipa manderangoniko dingtang dingtang dolrang, nangchongmotgipa lekkarangko sandiengani a·sel dingtang dingtang kamrangko ka·enggipa manderang, songtang noktangtangona katpilangtokahani gimin Shillong songjinmani Mawdiangdiang-o gital Assembly nokko rikanioba nangchakeaniko man·engaha.
Sukrobar salo, Meghalaya Legislative Assembly-ni Speaker Thomas A Sangma-ni kobor ra·timgipa manderangna parakatani gitade, ua Bristibar salo Mawdiangdiang-o rikenggipa Assembly nokko nina re·angon, kam ka·gipa manderang chu·ongjani a·sel kamrang ka·sinbatengaha ine nikna man·aha.
“Kamrangde nanga gita matchotengaha aro namen ka·engachim indiba kam ka·enggipa mitam manderangko biapo nikna man·jaha. Chinga sak 200-mangni gita manderangko kam ka·atengachim indiba da·o sak 50 ba 60-mangni gitasan kamko ka·enga. Iani a·sel kamko ka·anio nangchakeaniko man·enga,” ine Sangma aganaha.
Niam gri re·napbae kam ka·e cha·enggipa manderangko NGO-rangni am·sandiengani a·sel Assembly nok rikanio nangchakeaniko man·engama ine sing·anina aganchakaniko on·angskaengon, “Maini a·sel iakode anga ma·sija aro anga iani giminde mamingkoba aganna man·jawa. Indiba kam ka·giparang komienga aro iandake kamko ka·genchimode dongimin somoi gita matchotna man·janaba gnang,” ine Assembly Speaker aganaha.
Ia gital Assembly nokni jakra aro jakasi grangrangko rikani 95 ba 96 percent-ni gitade matchotaha ineba Speaker parakataha.
Da·o dipet gital Assembly nokko rikanio korosrang baridapkuja aro skang taridapgimin koros gitan apsan ong·kuenga ineba ua aganaha.
Gipin biaprangoni re·bae kam ka·e cha·enggipa manderangoniko dingtang dingtang dolrang, lekkarangko am·sandiengani gimin sak 2500-na baten kam ka·e cha·enggipa manderang, Meghalaya a·dokoni re·ongkatangtokahachim aro iani a·selan ma·mong sorkarini sanction ka·gipa dingtang dingtang project-rang da·o ja·donggaatako man·na nangskaengahachim.
Ia project-rangko jako ra·e ka·enggipa mitam contractor-rangni aganani gitade, a·dokona re·bae kam ka·e cha·enggipa manderangoni 90 percent-ni gitade, songtang noktangtangona katangpiltokahachim.
Meghalaya a·doko Inner Line Permit aro Meghalata Residents Safety & Security Act-ko sorkari ra·gate on·na man·jaengani gimin gipin biaprangoni re·bae kam ka·e cha·enggipa manderangko nirok sandina nangenga ine NGO-rang a·kangskaengachim.