TURA: Department-ni gita bolsal pangrangko dakki ka·gipa biapo Dambo Reserved Forest (Darugre Rangre)-o niamgri bol pangrangko den·ani bidingo am·sandianiko dakchina Williamnagar-ni Divisional Forest Officer (Territorial)-ko East Garo Hills-ni Rongjeng-oni A’chik Organization for Social Welfare (AOSW) mol·molangaha.
Williamnagar-o uamangni DFO-na matnangatanio, Dambo Rongdeng Sub-Beat Office-o ga·akgipa bolsal pang donggipa biapo Dambo Rongdeng Forest Reserve-o bolsa pangrangko den·e uarangko truck garirango gate salangenga ine organization matnangataha.
Organization -ni parakatani gitade, da·odiper bol 6 truck garirango Forest Officer baksa sriksrik donue palatenga aro palatgipa bolsal pangrangko gipinchina salangenga. Ia apsan dakgipa matnangataniko Darigre Forest-oni nakataha jeon DR/lot 7 aro 8-o bolsal pangrangni pal bolrangko den·angaha.
“DR/lot 7 aro 8-o da·oba bolsal pangrangni dongako nikuenga, uamangni biaprango niamgri bolsal bol pangrangko palate salruraengakua,” ine organization matnangataha.
Range Officer-ni rangka cha·ani ranta ka·aniko ra·chakna man·gijagipa kam ong·anio aganangaha, ia kamrango jemangan jak dongpaa uamangni kosako nangchongmotgipa ja·ku de·aniko dakna aro ta·rake am·sandianiko dakchina DFO-ko organization mol·molangaha.
