TURA: Tura-o Home Guard-rang, an·tangtangni kamko name chu·sokatengoba jabrini dormaharangko man·kujaengani a·sel neng·nikanirangko chagrongna nangtokenga ine A·chik Progressive Approach (APA) dol parakataha.
Iani bidingo a·dokni Chief Minister-na badi ka·e sedoatengon, Tura-ni Home Guard sipairangkoba Tura-ni Traffic Police-rang baksa traffic ba gari gorarangni re·ruraanirangko nirokna kamo donatenga aro Home Guard-rang, an·tangtangni kamrangko name chu·sokate on·engoba jabrini dormaharangko man·tokkujaenga ine APA parakataha.
APA-ni parakatani gitade, Khasi Hills a·jao Home Guard-ni kamko ka·enggipa sipairang jaantian an·tangtangni man·na nangenggipa dormaharangko man·tokenga indiba Tura-o kam ka·enggipa Home Guard-rangde somoi gita an·tangtangni dormaharangko man·tokskajaengachim.
“Mande ong·e Home Guard-rangba nokdangtangtangko chalaina nanga indiba Tura-o kam ka·enggipa Home Guard-rang da·o jabrini dormaharangko man·tokjaengani a·sel nokdangko chalaianio neng·nikanirangko chagrongna nangtokengaha,” ine APA parakataha.
Dormaharangko somoi gita man·jaengani a·sel Tura-o kam ka·enggipa sak 300 home guard-rang neng·nikanirangko chagrongna nangtokenga ine janapatengon, home guard-rangni neng·nikanirangko niatchina aro dormaharangko ta·raken on·china APA, a·dokni Chief Minister-ko mol·molataha.
 |
ReplyForward
|