TURA: Adita jarangni gisepon ong·atna sienggipa Gambegre Assembly constituency-ni by-election-o a·dokni Chief Minister aro National People’s Party (NPP)-ni national president Conrad K Sangma-ni jikgipa Mehtab Chandee A Sangma, NPP-ni candidate ong·e susaanggen.
Batanggimin sal somoirangonin, Gambegre by-election-na sako NPP-ni candidate ong·e susaatna sienga ine manderangni gisepo sing·anirang ong·kattokengachim indiba Sonibar salo, NPP-ni tom·bimonganiko Gambegre constituency-o ong·atanio, Mehtab Chandee A Sangma-kon NPP-ni candidate-na seokaha ine a·dokni Chief Minister aro NPP-ni national president Conrad K Sangma, jinmana parakataha.
Gambegre by-election-na dingtang dingtang dolrang, kamrangko ka·chichana a·bachengtokengahaon, NPP-ba Gambegre constituency-ni dingtang dingtang biaprangona wenroroe, campaign ka·na a·bachengataha.
Sonibar attamo, Gambegre constituency-ni song damsao a·dokni Chief Minister aro NPP-ni national president, an·tangni jikgipa Mehtab Chandee A Sangma-na campaign ka·angengon, Gambegre constituency-ni manderang, uni jikgipako an·tangtangni dilgipa ong·china nangnikengani giminsa ia by-election-o NPP-na candidate-na an·tangni jikgipako seokaha ine parakataha.
“Ua (Mehtab) skangonin politics-o gisik nanggipa ong·jachim aro pangnan politics-oni an·tangko chel·e rakkigipasa ong·achim. Indake ong·genchimoba da·o Gambegre-ni manderang, uko an·tangtangni seokgimin dilgipa ong·china nangniktokengani gimin ua ia by-election-o susana an·tangko on·kangaha,” ine Conrad aganaha.
Mehtab Chandee-ko Gambegre-ni MLA-na seokgenchimode ia constituency-o namroro silroroaniko ra·bana man·gen ine janapatengon, uni jikgipako Gambegre-ni manderang seokgenchimode ukoba uamang altuaen grongna aro an·tangtangni nanganirangko janapna cholrangko man·gnok ine a·dokni Chief Minister aganaha.
Ia 2024 bilsini Lok Sabha election-o Congress MLA Saleng A Sangma, Tura Parliamentary constituency-oni seokako man·e kamtangko watangahani gimin da·o Gambegre constituency-ni gital MLA-ko seoktaina nangengachim aro ia by-election-o NPP, Congress, TMC aro BJP dolrang susana gita kamrangko ka·sotokengahachim.
Gambegre by-election-o CM-ni jikgipa, NPP-ni candidate ong·e susagen
Date:
Share post:
