TURA: North Garo Hills a·jani Mendipathar-o gong kror 10 koros ong·e rikgipa Oyster Mushroom Cluster-ko Mongolbar salo, a·dokni Chief Minister Conrad K Sangma-ni jakchi kulie on·angaha.
Ia Oyster Mushroom Cluster-ko Sister Rose-ni dilanichi Mendipathar Multipurpose Cooperative Society jako ra·e rikaha aro ia project-na tangka paisarangko MSME-ni SFRUTI scheme baksana gong crore 3-ko a·dok sorkari dakchake on·aha.
Ia Mushroom Cluster-ko kulie on·angani somoio a·dokni Chief Minister, tom·anio bak ra·giparangna aganprakangengon, ia Oyster Mushroom Cluster-ko jolo songdongenggipa manderangna me·gimu ge·anio gisik nangchina didina gita rikaha aro ia Mushroom Cluster-ko rikanichi skanggipa bako sak 1000-mangni gita game ge·e cha·giparang namgnirangko man·gen ine parakangaha.
Ia sal somoirango a·gilsak gimikon manderang me·gimuko namnike sanditokengani gimin ia biapo iandakgipa Oyster Mushroom Cluster-ko kulianiara jolo game ge·e cha·enggipa manderangna namgni ong·gen ineba Sangma aganaha.
A·doko game ge·e cha·giparangko dakchakna gita sorkari, dingtang dingtang program-rangko a·bachengate on·enga ine janapangengon, me·gimu ge·anio gisik nanggipa manderangna aro dingtang dingtang dolrangna sorkari training-rangko on·gen ine Chief Minister parakataha.
Ia apsan salon a·dokni Chief Minister, rubber chimonganio jakkalna gita pick-up gari baksana barrel-rangkoba a·bachengate on·angaha.
North Garo Hills aro East Garo Hills a·jao rubber ge·giparang bang·en namgnirangko man·enga ine janapatengon, rubber game cha·enggipa manderang bang·bate namgnirangko man·china gita sorkari, rubber-oniko dingtang dingtang kamrangna jakkalna gitaba dakchakanirangko on·gen ine Chief Minister ku·rachakaniko on·angaha.
Ia salo, Rubber Cinx Unit-koba Mendipathar Multipurpose Cooperative Society-na pakwate on·angjolaha.
Mendipathar-o Oyster Mushroom Cluster-ko CM-ni jakchi kulie on·anga
Date:
Share post: