TURA: Adita jarangni gisepon ong·atna sienggipa Gambegre Assembly constituency-ni by-election-o susana gita Congress dolni tikitko Tura-ni MP aro Gambegre-ni gitcham MLA Saleng Sangma baksa melibatranggipa manderangoni saksa Jingjang M Marak-na on·ani cholrang donga.
Koborko man·soani gitade, da·o dipet Jingjang Marak saksasan Congress dolni tikitna dorgastoko galkuengpiti aro uni bimingko District Congress Committee (DCC), Meghalaya Pradesh Congress Committee (MPCC)-na watatmanaha.
“Da·o dipet Gambegre by-election-o susana gita Congress dolni tikitna dorgasto galgiparang Jingjang Marak-na agre darangba dongkuja aro DCC-oba bang·bata dilgiparangan uko candidate mingna nangniktokahani gimin da·o uni bimingko MPCC-ona watataha,” ine Congress doloni kobor on·timgiparang parakataha.
Congress dolni tikitna susaenggipa Jingjang Marak, 2013 bilsini Assembly election-o Rangsakona constituency-oni Independent candidate ong·e susaahachim indiba ua 877 vote-rangkosan man·rikaiahachim.
Ia chang Gambegre by-election-ode ua Congress doloni susaskana da·o tikitna dorgastoko galataha.
Indake ong·engon, Gambegre by-election-o susana gita National People’s Party (NPP)-ba a·dokni Chief Minister aro NPP-ni national president Conrad K Sangma-ni jikgipa Mehtab Chandee A Sangma-ko seokmanahachim.
Koborko man·soani gitade, Trinamool Congress (TMC) dolba ia by-election-o susana gita a·dokni gitcham Minister Zenith M Sangma-ni jikgipa aro Dengnakpara-ni MDC Sadhiarani M Sangma-ko seokaha indiba da·o dipet TMC-ni gita ia by-election-o susagniko jinmana parakskakujaenga.
Gambegre by-election-o Bharatiya Janata Party (BJP)-ba susana gita kamrangko ka·soengaha aro ia by-election-o Tura-ni MDC aro state vice president Bernard N Marak-ko BJP-ni candidate-na mingani cholrang dongenga.
Ia 2024 bilsini Lok Sabha election-o Congress MLA Saleng A Sangma, Tura Parliamentary constituency-oni seokako man·e kamtangko watangahani gimin da·o Gambegre constituency-ni gital MLA-ko seoktaina nangengachim aro ia by-election-o NPP, Congress, TMC aro BJP dolrang susana gita kamrangko ka·sotokengahachim.