TURA: Dingtang dingtang award-rangko man·e a·gilsakni dingtang dingtang mingsing minggamako man·enggipa ‘Rapture’ jawilwatko re·anggipa Bristibar saloni a·bachenge, skanggipa changna Tura-ni District Auditorium-o mesokengaha aro ia jawilwatko re·baenggipa August 25 tarikona kingkingan ia apsan biapon mesokanggen.
Ia ‘Rapture’ jawilwatko skanggipa changna a·songni jakgitelaniko salko maniani somoio mesokangaha aro ia jawilwatko mesokchengani salo, manderang chakpilgija ia jawilwatko nitokaha.
Ia jawilwatko, dingtang dingtang award-rangko man·gipa aro jawilwat tarianio mingsing minggamako man·gipa Dominic Megam Sangma tariaha aro ia jawilwatko tarianio Eva Gunme Marak, una dakchakanirangko on·aha.
Ia jawilwatara, walni somoio mikgri ong·e saa donggipa bilsi 10-ni me·a bi·sani golpoko tarigipa jawilwat ong·a aro ia jawilwato ia me·a bi·sa, songo manderangni gimarongani ja·man, mande rim·gittanggiparang, be·enni bakrangko badingenga ine jangbingbanganirangko knasoenba, kene janggi tangachim.
Ia jawilwatko A·chikrangni dakbewal rikbewalo pangchake tariaha aro ia jawilwatko tarianio, Hubert Bals, Visions Sud Est aro Doha Film Institute-ba dakchake on·aha.
Ia jawilwatko tarina korosrangko Dominic Sangma-ni Anna Films, China-ni Xu Jianshang aro Sun Li, India-ni Anu Rangachar, Harsh Agarwal, Aditya Grover aro Stephen Zacharias nangrime dakchakaha.
Ia jawilwatko tarianio Northeast India-ni art-rangko namnikgipa Eva Gunme R Marak-ba mongsonggipa daitoko jako ra·aha.
Ia ‘Rapture’ jawilwat, a·gilsakni gipin biaprangoba mingsing minggamako man·aha aro da·o ia jawilwatko Tura-oba Meghalaya sorkarini Arts & Culture Department aro Directorate of Information & Public Relations baksa nangrime mesokna cholko man·engaha.