Cong, party-ni kosako ka·badeani gimin sak 2 MLA-rangko dondipata

SHILLONG: Meghalaya Congress uamangni da·o ong·enggipa sakgni MLA-rang-Gabriel Wahlang aro Charles Marngar-maangko uamangni bil-sason ka·enggipa National People’s Party-o napna ja·ku de·enga ine koborko man·ani ja·mano mini Sukrobar-o jinma chanchie uamangko dondipataha.
Party-ni sak gittam MLA-rang Umsning-oni Celestine Lyngdoh, Nongstoin-ni Gabriel Wahlang aro Mawhati-oni Charles Marngar-maang NPP-o napangna nidinenga ine koborrangko man·anichi Congress-oni ia ja·kuko de·na gita nangaha.
Gabriel Wahlang aro Charles Marngar-na dingtang dingtang dake chittirangko seatgipao,  uamangni party-ni kosako ong·gija dake kamrangko ka·ani gimin gitalgipa u·iataniko on·taikujana kingking bilsi dok bilsirangna da·aloni Indian National Congress-oni uamangko dondipatna ua bil gnangipaoni ge·etako man·aha ine Meghalaya Pradesh Congress Committee general secretary Wansuk Syiem aganaha.
MDA sorkari baksa uamangni melianiko mesoke Block Congress Committee aro frontal organisation-oniko ru·utgija salo koborrangko man·gipao pangchake ia ja·kuko de·aha ine chittio janapaha.
“Uamangni kosako ja·ku de·anirang joljol party-ni miksong-chanchianirang baksa nangchakea,” party aganaha.
NPP-o napnaba donga ine kobor man·gipa Celestine Lyngdoh-kode maibakai Party watchangaha.
Mija Sukrobar salo a·dokni Congress, ua sak gittam MLA-rangna lekkarangko sokataha indiba Celestine-san ua uni gisiko chanchikujaenga ine aganaha.
Uamang NPP-o napna chanchia dongkujaenga ine Celestine, party president Vincent H Pala-na aro gipinrangna aganaha.
Uamang NPP-o napoba uamangni constituency-rangko namroro-silroroatna tangka-paisarangko dakchakatna Congress MLA-rangko ka·dongataha, ua aganaha.
NPP, namroro-silroroatna ku·rachakmangmangaia indiba maming kam ka·anirang ba namdapatanirang aro project-rang pangchakani ro·ongrangko songari kam ka·anirang dongja ine Pala aganaha.
NPP-chi dilenggipa MDA sorkari cha·bok-rusigipa aro rasongko amaigipa ong·a, Conrad K Sangma-chi dilenggipa party niam gri pekatgipa ringa-cha·anirangko, koelarangko badingsruke aro contract kamrangko tik ong·gija ka·e man·gipa tangkarangchi gipin party-rangko bon·atna jotton ka·enga, Pala aganaha. Chanchirimao, NPP-ni ja·gao ga·akjachina Celestine-ko ku·pattiaha.
Gambegre bye-election aro MDA poll-rang ong·na skang NPP aro BJP, Congress-ko nosto ka·na jotton ka·enga, Pala aganaha.
Uamang party-ko wate NPP-o napode uamangni kosako ja·ku de·na sak gittam MLA-rangko Congress dilgipa mikrakataha. “Skango jemangan party-ko wate kata uamangni kosako ja·ku de·gen chinga darangkoba watjawa,” Pala aganaha.
Pala-ni mikrakatani adita kontarangni ja·mano dondipatani chittirangko on·ataha.