TURA: South Garo Hills a·jao National Highway-62 (217) ramako ta·raken double lane dake tarichina aro kamrangko ka·anio neng·nikanirang donggenchimode namjabatsranggipa bakrangko ta·raken tarie on·skachina dabie, Baghmara-ni dingtang dingtang dolrang, da·al Sombar saloni a·bachenge, Baghmara-ni NH Division office-ko picketing ka·anggen aro joljol Sukrobar salo jinma tom·e re·jomaniko ong·atanggen ine parakataha.
Iani bidingo South Garo Hills a·jani dingtang dingtang NGO-rang, chong·motan GSU, FKJGP, ADE, AHAM, AYWO, NGCO, GSMC, AOSW, ASPF aro APA dolrang, adita salrangna skangan South Garo Hills a·jani Deputy Commissioner-na sedoataha aro ia NH-62 (217) ramako ta·raken tarichina didiatahachim.
Ia NH-62 ba 217 ramako tarie on·china didiatengon, ia ramani obostarang da·o namsrangjahani a·sel re·ruraenggipa manderang neng·nikanirangko chagrongna nangenga aro ian re·ruraenggipa manderangna kenchakna nanganiba ong·enga ine NGO-rang parakatenba, jolo songdongenggipa manderangni namgnina aro ramako re·ruraenggipa manderangni namgnina ia ramako ta·raken tarie on·china sorkariko didiataha.
Iana skangba, South Garo Hills a·jani NGO-rang, re·anggipa antionin, ia office-ko kam ka·na on·gija jingjengatanirangko dakangtokahachim ine kobor on·aha.
