TURA: Tura-ni mande saksako rim·gittanganina dolsa manderangko Robibar attamo police-rang, Assam a·dokni Dudhnoi-o rim·na jotton ka·on, ia manderang police-rangoni joke katna man·aha.
Koborko on·ani gitade, dolsa manderang, re·anggipa August-ni 10 tariko Tura-ni contractor saksako rim·gittangahachim indiba ua somoio ua an·tangni ripengskarang baksasa ong·katanggen ine darangba ia mandeni gimin dal·e ra·bretokkujaengachim. Indake ong·genchimoba, ja·mano ia mandeko rim·gittanganggipa manderang, uni nokdangoniko tangka dabina a·bachengon, ia mandeni ma·drangrang, police-rangna kobor on·ataha.
Koborko man·soa bakan police-rang, ia mandeko jokatna aro uko rim·gittanganggipa manderangko rim·na sandina a·bachengataha.
Indake ong·genchimoba ja·mano ia mande, an·tangko rim·gittanganggiparangoni maibakae joke katna man·enba Assam-ni Boko police station-o badi ka·eaha.
Police-rangni u·iatani gitade, ia mandeni ja·a aro jakrangko buduchi kaenba sichina ine chiakol damsao galangahachim indiba ua rasong gnange kaoni jokenba Boko police station-ona katangna man·aha.
Ia mandeko rim·gittanganggiparang, uko siaha ine chanchienba, uni nokdangoniko tangka dabiatkuaha aro uandaken police-rang, ia manderangko rim·na cholko tariaha.
Ia manderang, tangkarangko ra·e Dhupdhara-ona re·angchina aganatahachim indiba police-rang, uamangko Dudhnoi-oniko tangka ra·eskachina okamatmikaha. Ia manderang Dudhnoi-ona re·angna tik ka·atani ja·man, North Garo Hills aro West Garo Hills a·jani police-rang, Assam police-rang baksa nangrime, ia manderangko rim·na, ramram gandingrangko gane Dudhnoi-o sengsoaha.
Indake ong·genchimoba, ia manderang, Dudhnoi-o donggipa Meghalaya Bud Stand sambaona sokbaon, police-rang donga ine ma·sienba, police-rang rim·na skangan ua biaponi katna man·aha. Ia manderangko rim·na gita police-rang, Dudhnoi bazaar-o changgittamde goahachim indiba ia manderang, an·tangtangni ra·anggipa scooty-ko ua biapon gale, mande bang·gipa biap gita joke katangna man·aha.
“Ua somoio Dudhnoi bazaar-o manderang bang·ani gimin chinga mamingkoba dakna man·jaha indiba chinga nanga gita sakkirangko man·ahani gimin ia manderangko bakan rim·na ka·dongenga,” ine West Garo Hills a·jani SP Abraham T Sangma parakataha.