RESUBELPARA: Tura-ni mande saksako rim·gittanganina rim·na jotton ka·engmiting somoio Dudhnoi-o joke katgipa manderangoni saksako police-rang rim·na man·aha.
Ia manderangko Robibar attamo police-rangni rim·na jotton ka·engmiting somoio joke katani ja·man silchidarerangchi goahachim aro police-rangni goanio ia manderangoni sakgnide guli nanga man·e saknaanirangko man·ahachim ine kobor on·aha.
Police-rangni u·iatani gitade, ia manderangoni saksani bidingo kobor man·soani ja·man police-rang, Ramu Ch Marak minggipa mande saksako rim·na man·aha. Ia mandeara Meghalaya a·dokonin ong·achim indiba Assam-ni me·chikko bia ka·e dongengachim.
Koborko on·ani gitade, Robibar attamo ia manderangni joke katna jotton ka·engmiting somoio police-rangni goanio, ia mandeni ja·ao guli nanga man·e saknaaniko man·ahachim aro uni ja·man ua electric auto-o katenba ua somoionin dongnue dongengachim.
Ia manderang Robibar attamo police-rangoni joke katna jotton ka·engmiting somoio an·tangtangni ra·bagipa scooty aro mobile phone-rangkoba ua biapon galangaha aro uandaken police-rang, ia mobile-rangoni dakchakanichin ia mandeko rim·na man·aha.
“Police-rangni goanio sakgipin mandekoba uni ja·pingo guli nangaha indiba da·o dipet ua kate dongkuenga. Ia mande rim·gittanggipa dolko, bobil dake chakatgipa dolni gitcham membor saksa dilaha aro da·o chinga uamangko rim·na sandiengkua,” ine Police official-rang parakataha.
Koborko on·ani gitade, dolsa manderang, re·anggipa August-ni 10 tariko Tura-ni contractor saksako rim·gittangahachim indiba ua somoio ua an·tangni ripengskarang baksasa ong·katanggen ine darangba ia mandeni gimin dal·e ra·bretokkujaengachim. Indake ong·genchimoba, ja·mano ia mandeko rim·gittanganggipa manderang, uni nokdangoniko tangka dabina a·bachengon, ia mandeni ma·drangrang, police-rangna kobor on·ataha.
Koborko man·soa bakan police-rang, ia mandeko jokatna aro uko rim·gittanganggipa manderangko rim·na sandina a·bachengataha.
Indake ong·genchimoba ja·mano ia mande, an·tangko rim·gittanganggiparangoni maibakae joke katna man·enba Assam-ni Boko police station-o badi ka·eaha.
Police-rangni u·iatani gitade, ia mandeni ja·a aro jakrangko buduchi kaenba sichina ine chiakol damsao galangahachim indiba ua rasong gnange kaoni jokenba Boko police station-ona katangna man·aha.
Ia manderangko police-rang, re·anggipa Robibar attamon, Dudhnoi-oniko rim·na jotton ka·ahachim indiba ia manderang, police-rangni dongako ma·sienba, ua biaponi joke katna man·ahachim.