Tura: All Garo Hills Mangsang-Ampang Association (AGHMAMA)-ni chang 14-gipa General Conference-ko Sonibar salo Tura, Danakgre, Wanosa resort-o ong·atangaha, jeon Mangsang-Ampang Mahari, Tura MP seoka man·gipa Saleng A Sangma-na mande ra·aniko dakangaha.
Tura MP Saleng, Ampang Maharioni ong·a, una nitobegipa rongni Pandra ba Garo-rangni traditional scraf-ko pataha. MP election-o cheani gimin aro bilsi 15-na Gambegre Assembly Constituency-ni legislator ong·e a·dokni manderangna dangdike on·ani gimin una mande ra·aniko dakangaha.
‘Gachi’ sakgipingipa Abraham T. Sangma, IPS, Tura-ni Superintendent of Police, jean mahari-ma·drangna mikkim rasongko ra·baaha, unaba mande ra·aniko dakangaha. Abraham T Sangma-ko mejaomangmang IPS cadre-ona ra·doaha.
Maharini sakgni chrarang aro niksenggiparang- state Legislative Assembly-ni Speaker -Thomas A. Sangma aro Education Department-ni Minister Rakkam A Sangma- uamangkoba mande ra·angaha.
Iamangna agreba kal·susani a·bao chu·sokgiparang -Master Marbaniang M Sangma aro Master Nambearo M Sangma- uamangnagba certificate-rangko on·e mande ra·angaha. Uamang Meghalaya Sub-Junior aro Junior Boys and Girls Boxing Championship 2024-o Bronze Medal aro Gold Medal-ko man·aha.
